2014 సంక్రాంతి కానుకగా వచ్చి సూపర్ హిట్ అయిన తమిళ సినిమా జిల్లా'కి ఇది డబ్బింగ్ వెర్షన్. ఇక కథలోకి వస్తే.. ఆంధ్రలో పవర్ఫుల్ ప్రాంతమైన బెజవాడలో ఫేమస్ రౌడీ డాన్ శివయ్య(మోహన్ లాల్). అతని దగ్గర పనిచేస్తూ, తనని కాపాడపోయి చనిపోయిన డ్రైవర్ కొడుకు శక్తి(విజయ్)ని శివయ్య  పెంచుతాడు. శివయ్య - శక్తి సొంత తండ్రీ కొడుకుల్లా పెరుగుతారు. ఆ జిల్లాలో ఏం తప్పు జరిగినా అది మేమే చెయ్యాలి అనే మనస్తత్వం కలవాళ్ళే ఈ శివయ్య - శక్తి. తన తండ్రిని ఒక పోలీస్ ఆఫీసర్ చంపాడు అనే కారణం చేత శక్తికి పోలీసులంటే కోపం, అసూయ. ఓ రోజు శక్తి శాంతి(కాజల్ అగర్వాల్)ని చూసి ప్రేమలో పడతాడు. కానీ తను పోలీస్ ఆఫీసర్ అని తెలిసి ప్రేమని కాన్సల్ చేస్తాడు. ఇలా జరుగుతున్న టైంలో బెజవాడ కమీషనర్ గా ప్రదీప్ రావత్ ఎంటర్ అవుతాడు. ఎంటర్ అవ్వడమే శివయ్యని ఓ ఘోర అవమానానికి గురి చేస్తాడు. దాంతో శివయ్య తమకి అడ్డుగా నిలుస్తున్న ఆ ఏరియా ఏసిపిగా మన వాడు ఉంటేనే ఆ ఏరియాలో తనకి మరింత గ్రిప్ వస్తుందని శక్తిని ఏసిపి చెయ్యాలనుకుంటారు. శక్తికి ఇష్టం లేకపోయినా బలవంతంగా ఏసిపిని చేస్తారు. శక్తి ఏసిపి అయిన తర్వాత ఓ సంఘటన వలన శివయ్యకి ఎదురు తిరుగుతాడు.? అలా ఎదురు తిరిగి ఏం చేసాడు.? శక్తిని శివయ్యకి ఎదురు తిరిగేలా చేసిన సంఘటన ఏది.? అనే విషయాలను మీరు సిల్వర్ స్క్రీన్ పైన చూడాలి.. 

ఈ సినిమాలో ఆడియన్స్ కి ఆసక్తి కలిగించేది మోహన్ లాల్ - విజయ్ కాంబినేషన్. మోహన్ లాల్ శివన్న పాత్రలో సూపర్బ్ గా చేసాడు. ఒకే పాత్రలో పాజిటివ్ మరియు నెగటివ్ షేడ్స్ ని బాగా చూపించాడు. ఇకపోతే ఇలయథలపథి విజయ్ కి ఇలాంటి పాత్రలు చేయడం కొత్తేమీ కాకపోవడం వలన ఎప్పటిలానే తన పాత్రకి న్యాయం చేసాడు. విజయ్ లో మనం కొత్తగా చూసేదీ ఏమీ ఉండదు. పాత్ర పరంగా కామెడీని, సీరియస్ నెస్ ని బాగా చూపించాడు. మోహన్ లాన్ - విజయ్ కాంబినేషన్ సీన్స్ బాగుంటాయి. కానీ వీరికి చెప్పిన వాయిస్ లు పర్ఫెక్ట్ గా సెట్ అవ్వలేదు. కాజల్ అగర్వాల్ ది ఒక గ్లామరస్ రోల్ మాత్రమే.. కథలో అక్కడక్కడా గ్లామర్ అట్రాక్షన్ మరియు పాటల కోసం తప్ప ఇంకదేనికీ వాడుకోలేదు. సూరి చేసిన కామెడీలో ఒకటి రెండు పంచ్ లు బాగా పేలినా మిగతావి మాత్రం పెద్దగా వర్క్ అవుట్ అవ్వలేదు. బ్రహ్మానందం చేత చేయించిన గెస్ట్ రోల్ పెద్దగా ఆకట్టుకోలేకపోయింది. సంపత్ నెగటివ్ షేడ్స్ పాత్రలో బాగానే చేసాడు. ప్రదీప్ రావత్, మహాత్ రాఘవేంద్ర, తదితరులు తమ పాత్రల్లో ఒక అనిపించారు. 

తమిళంలో గత ఏడాది మొదట్లో వచ్చి హిట్ అయిన ఈ సినిమా 'జిల్లా'. రొటీన్ కథే అయినా ఆడియన్స్ కోరుకునే అన్ని మాస్ మసాలా ఎలిమెంట్స్, మోహన్ లాల్ - విజయ్ క్రేజీ కాంబినేషన్ ఈ సినిమాకి హెల్ప్ అయిన పాయింట్స్. తెలుగులో కూడా అవే ఎలిమెంట్స్ హైలైట్ అయ్యాయి. కొన్ని డబ్బింగ్ సినిమాలు కాస్త డిఫరెంట్ కాన్సెప్ట్ తో వచ్చి మెప్పిస్తుంటాయి. కానీ ఇది మాత్రం మన తెలుగులో వచ్చిన ఎన్నో కమర్షియల్ మాస్ మసాలా సినిమాల్లానే ఉంటుంది. డైరెక్టర్ నేసన్ ఎలాంటి కొట్టడం లేకుండా రెగ్యులర్ కథకి కొన్ని మాస్ ఎలిమెంట్స్ ని జత చేసి ఈ సినిమాని తీసేసాడు. ఓవరాల్ గా జిల్లా సినిమా తమిళం నుంచి తెలుగులోకి డబ్ అయిన ఓ రెగ్యులర్ మాస్ మసాలా ఎంటర్టైనర్. కేవలం మాస్ ఆడియన్స్ నుంచి మాత్రం కాస్త కాసులు కలెక్ట్ చేసుకునే సినిమా 'జిల్లా'.