స్వీటీ అలియాస్ సౌందర్య(అనుష్క) బాగా బొద్దుగా, లావుగా ఉంటుంది. దాంతో స్వీటీ మదర్ రాజేశ్వరి (ఊర్వశి) ఎన్ని పెళ్లి సంబంధాలు తీసుకొచ్చినా ఎవ్వరూ చేసుకోవడానికి ముందుకురారు. ఫైనల్ గా మన హీరో అభి(ఆర్య) వస్తాడు, కానీ ఓ రీజన్ వల్ల స్వీటీ అభిని రెజెక్ట్ చేస్తుంది. కట్ చేస్తే మళ్ళీ మళ్ళీ కలుసుకున్న అభి - స్వీటీలు ఫ్రెండ్స్ అవుతారు. స్వీటీ ఫ్రెండ్షిప్ కాస్తా ప్రేమగా మారుతుంది. అది చెప్పే టైంలో వీరి మధ్యలోకి సిమ్రాన్(సోనాల్ చౌహాన్) ఎంటర్ అవుతుంది. దాంతో అభి సిమ్రాన్ ప్రేమలో పడతాడు. అది చూసిన స్వీటీ బాగా బాధపడి, అర్జంట్ గా సన్నబడి పెళ్లి చేసుకోవాలని ఫిక్స్ అవుతుంది. అందులో భాగంగా సత్యానంద్(ప్రకాష్ రాజ్) స్థాపించిన సైజ్ జీరో అకాడమీలో చేరుతుంది బరువు తగ్గడానికి. కట్ చేస్తే అక్కడ ఓ సమస్య, ఆ సమస్యని పరిష్కరించడం కోసం మళ్ళీ అభి, సిమ్రాన్ ల హెల్ప్ తీసుకుంటుంది. ఇంతకీ ఆ సమస్య ఏమిటి? ఎలా ఆ సమస్యను పరిష్కరించారు? ఈ సమస్యని పరిష్కరించే టైంలో వచ్చిన మార్పులేమిటి? చివరికి ఎవరు ఎవర్ని పెళ్లి చేసుకున్నారు అన్నదే అసలైన కథ..     

బాహుబలి, రుద్రమదేవి లాంటి సినిమా తర్వాత అనుష్క నుంచి వస్తున్న సినిమా అనగానే, అది ఏ జానర్ సినిమా అయినప్పటికీ అంచనాలు మాత్రం బాగానే ఉంటాయి. కానీ ఆ అంచనాలను 5% కూడా అందుకోలేకపోయిన సినిమా 'సైజ్ జీరో'. ఈ వారం రిలీజ్ అయిన 'తను నేను' లానే ఈ సినిమాని కూడా ఒక గంట డాక్యుమెంటరీ సినిమాలా చేసి యు ట్యూబ్ లో రిలీజ్ చేసి ఉంటే మంచి పేరు వచ్చేది,అలాగే అనుకున్న పాయింట్ ని పర్ఫెక్ట్ గా చెప్పాం అన్న ఫీలింగ్ కూడా దక్కేది. కానీ దానిని సాగదీసి 131 నిమిషాలు చేసి డబ్బులు పెట్టి వచ్చే ప్రేక్షకులను భాగా ఇబ్బంది పెట్టేసారు. సైజ్ జీరో సినిమాలో థియేటర్ కి వెళ్లి చూసి ఎంజాయ్ చేసే ఎలిమెంట్స్ ఏమీ లేవు. మీరు అనుష్కకి డై హార్డ్ ఫ్యాన్ అయితే వెళ్ళండి, వెళ్లి అనుష్కని మాత్రమే చూస్తూ ఉండండి, అలా కాదని ఈ కథేంది, ఎలా వెళ్తోంది అని ఆలోచించారో మీకు తలనొప్పి వస్తుంది. సైజ్ జీరో కోసం అనుష్క వెయిట్ పెరిగింది కానీ కథలో మాత్రం అస్సలు వెయిట్ లేదు.