తెలుగు ఇండస్ట్రీలో ఇప్పటి వరకు మెగా ఫ్యామిలీ నుంచి హీరోలు మాత్రమే ఎంట్రీ ఇస్తున్న తరుణంలో మొట్ట మొదటి సారిగా నాగబాబు కూతురు కొణిదెల నిహారిక హీరోయిన్ గా ఎంట్రీ ఇస్తుంది. అయితే ఇప్పటికే నిహారిక షార్ట్ ఫిల్మ్స్ లో, బుల్లితెరపై తన ప్రతిభ నిరూపించుకొని తెలుగు ప్రేక్షకుల మనసు దోచుకుంది. అంతే కాదు ఒక మనసు ఆడియో ఫంక్షన్ కూడా గ్రాండ్ గా జరగడంతో..ఈ చిత్రంపై భారీ అంచనాలే పెరిగిపోయాయి.
నిహారిక కొణిదెల నాగ శౌర్య జంటగా, TV 9 సమర్పణలో, మధుర ఎంటర్ టైన్ మెంట్ పతాకంపై రామరాజు దర్శకత్వంలో మధుర శ్రీధర్ రెడ్డి నిర్మించిన ఒక మనసు చిత్రం జూన్ 24 న విడుదలకు సిద్ధమవుతోంది. ఇటివలే మెగా హీరోల చేతుల మీదుగా విడుదలైన పాటలకు శ్రోతలనుండి విశేష స్పందన లభిస్తోందని, సినిమా ఫస్ట్ లుక్ మొదలుకుని ఇటివలే విడుదలైన థియేట్రికల్ ట్రైలర్ వరకూ ప్రేక్షకుల నుంచి లభిస్తున్న అనూహ్యమైన స్పందన తమకెంతో ఆనందాన్ని కలిగిస్తుందని చిత్ర నిర్మాత మధుర శ్రీధర్ రెడ్డి తెలిపారు.
ఇప్పటి రొటీన్ చిత్రాలకి విభిన్నంగా ఒక హృద్యమైన ప్రేమకధతో ప్రేక్షకుల ముందుకు వస్తున్న ఈ చిత్రంలో నిహారిక, నాగ శౌర్యల నటన ఆకట్టుకుంటుందనీ, ప్రేమ, కుటుంబం, బాధ్యతలు వాటి విలువలు లాంటి అంశాలతో ముడిపడివున్న ఈ ఒక మనసు సినిమా ప్రతి మనసుని అలరిస్తుందని, సునీల్ కశ్యప్ బాణీలు అందించిన ఈ చిత్రాన్ని జూన్ 24 వ తేదీన ప్రేక్షకుల ముందుకు తీసుకురావడానికి సన్నాహాలు చేస్తున్నామని దర్శకుడు రామరాజు తెలిపారు.
