తెలుగు ఇండస్ట్రీలో ఇప్పటి వరకు కనీ వినీ ఎరుగని రీతిలో అత్యంత భారీ బడ్జెట్ చిత్రంగా తెరకెక్కింది..బాహుబలి, బాహుబలి 2. ప్రపంచ స్థాయిలో భారతీయ చలన చిత్రాల ఖ్యాతిని నలు దిక్కులా చాటి చెప్పింది బాహుబలి సీరిస్. తెలుగు ఇండస్ట్రీలో ఇంత అద్భుతమైన చిత్రాలు వస్తున్నాయా అని అన్ని ఇండస్ట్రీలు చర్చించుకునే స్థాయికి ప్రముఖ దర్శకులు ఎస్ ఎస్ రాజమౌళి తీసుకు వచ్చారు. అంతే కాదు భారత దేశంలో అత్యధికంగా వసూళ్లు చేసిన చిత్రంగా బాహుబలి 2 రికార్డు నమోదు చేసుకుంది. వసూళ్ల విషయంలో, బడ్జెట్ వ్యవహారాల విషయంలో ‘బాహుబలి’ తర్వాతే అనిపించుకున్నాయి.
‘నాన్ బాహుబలి’ రికార్డ్స్ అనే మాట పుట్టుకు వచ్చింది. బాహుబలి వసూళ్లు, బడ్జెట్ వ్యవహారాలను ఎవరూ టచ్ చేయలేరు అన్న పరిస్థితికి వచ్చింది. అయితే ఇప్పుడు ఆ రికార్డు బ్రేక్ చేసింది 2.0. రజనీకాంత్ హీరోగా నటించిన ‘రోబో’ సినిమాకు సీక్వెల్ గా వస్తున్న 2.0 కు సంబంధించి ఇప్పుడు కొత్త రికార్డులకు నాంది పలుకుతుంది. శనివారం రిలీజ్ అయిన 2.0 మేకింగ్ వీడియో చూస్తుంటే..హాలీవుడ్ కి ఏమాత్రం తీసిపోని విధంగా అనిపిస్తుంది.
ఇక థియేటర్లో ఈ సినిమా ఏ రేంజ్ లో రచ్చచేయనుందో కొత్తగా చెప్పాల్సిన అవసరం లేదు. అంతే కాదు భారతీయ చలన చిత్ర రంగంలో అత్యంత భారీ బడ్జెట్ సినిమా గా ‘2.0’ నిలుస్తోంది. అయితే ‘బాహుబలి’ ‘బాహుబలి-2’ సినిమాల బడ్జెట్ కలిపి 450 కోట్ల రూపాయలు. కానీ ‘2.0’ విషయంలో సింగిల్ గానే నాలుగు వందల కోట్ల రూపాయలు పెడుతున్నారు.
దీంతో.. దేశీయ సినిమాల్లో అత్యంత భారీ బడ్జెట్ సినిమాగా ఇది తొలి స్థానాన్ని సంపాదించుకుంటోంది. అంతే కాదు ఈ సినిమాను తమిళ, తెలుగు, హిందీ, మలయాళ భాషలతో పాటు జపాన్, కొరియా, చైనాల్లో భారీ ఎత్తున విడుదల చేయడానికి సమాయత్తం అవుతున్నారు. మరి చిత్రం విడుదల తర్వాత వసూళ్లు ఏ రేంజ్ లో వస్తాయో..ఎన్ని రికార్డులు కొల్లగొట్టనుందో అని రజినీ ఫ్యాన్స్ ఎంతో ఉత్సాహంతో ఎదురు చూస్తున్నారు.
