తెలుగు, తమిళ ఇండస్ట్రీలో తనకంటూ ప్రత్యేక ఇమేజ్ సొంతం చేసుకున్న తమిళ హీరో విజయ్ రీసెంట్ గా ‘మెర్సల్’ తెలుగు లో అదిరింది తో ప్రేక్షకుల ముందుకు వచ్చాడు. తమిళ ఇండస్ట్రీలో సూపర్ స్టార్ రజినీకాంత్ తర్వాత ఆ రేంజ్ మాస్ ఫాలోయింగ్ సంపాదించింది విజయ్ అనే చెప్పొచ్చు. తాజాగా విజయ్ కి ఓ అరుదైన గౌరవం దక్కింది. సీబీఎస్ఈ మూడవ తరగతి పాఠ్యపుస్తకంలో విజయ్ ఫొటోను పొందుపరిచారు. సాధారణంగా తమిళ సంప్రదాయానికి అద్దం పట్టేలా పురుషులు ధోవతి, ఆఫ్ చొక్కా ధరిస్తుంటారు.
సామాన్యుల నుంచి సెలబ్రెటీల వరకు ఈ సాంప్రదాయాన్నే ఎక్కువ పాటిస్తుంటారు. ఈ నేపథ్యంలో తమిళనాడులో పురుషుల డ్రెస్సింగ్ స్టైల్ ను విద్యార్థులకు తెలియజెప్పే నిమిత్తం పంచె, చొక్కా ధరించి ఉన్న విజయ్ ఫొటోను ఈ పాఠ్య పుస్తకంలో పొందుపరిచారు. అంతే కాదు తమిళనాడులో ఎంతో వైభవంగా జరుపుకునే పండుగ ‘పొంగల్’అని, రైతుల పండగ అని, జనవరి నెలలో మూడు రోజుల పాటు ఈ పండగను నిర్వహిస్తారని ఆ పుస్తకంలో రాశారు.
ఈ మద్య విజయ్ నటించిన ‘మెర్సల్’ చిత్రంలో ఎయిర్ పోర్ట్ లో ఈ తరహా సాంప్రదాయ దుస్తులు ధరించి వెళ్లడం..అక్కడ గార్డులు అతనిని అవమానించేందుకు ప్రయత్నించగా..విజయ్ గొప్ప డాక్టర్ అని తెలిసిన తర్వాత వారు మాపణలు చెప్పడం విజయ్ ని గౌరవించడం ఈ సన్నివేశంలో జరుగుతుంది. తమిళ సంప్రదాయానికి గౌరవాన్ని తీసుకువచ్చిన విజయ్ ఫొటోను సీబీఎస్ఈ పాఠ్యపుస్తకంలో పొందుపరచడంపై ఆయన అభిమానులు సంతోషం వ్యక్తం చేస్తున్నారు.