ఐసిస్ ఉగ్రవాదులు ప్రపంచ వ్యాప్తంగా రెచ్చిపోతున్నారు. ఫ్రాన్స్, జర్మనీ, టర్కీ.. ఇలా ఏ దేశాన్నీ వదలిపెట్టడం లేదు. అలాంటిది మన ఇండియాపైనా వారి కన్ను ఉండదని అనుకోలేం. అంతే కాదు.. మన డిల్లీకి ఉగ్రముప్పు పొంచి ఉందట.
ఈ మేరకు కేంద్రభద్రతా సంస్థలు హెచ్చరించాయి. జాతీయ రాజధాని ప్రాంతంలోని వివిధ భద్రతా దళాల ప్రధాన కార్యాలయాలపై బాంబుదాడులు జరగొచ్చని విశ్వసనీయ సమాచారం. ఇవే కాకుండా ఐబీ, రా వంటి నిఘా సంస్థల ప్రధాన కార్యాలయాలు కూడా ఢిల్లీలోనే ఉంటాయి.
ఈ సంస్థలకూ ఉగ్రదాడి జరిగే ప్రమాదముందని ఆయా సంస్థలన్నీ అప్రమత్తంగా ఉండాలని భద్రతాదళాలు సూచిస్తున్నాయి. డిల్లీ రాజధాని ప్రాంతం పరిథిలో భద్రతను కట్టుదిట్టం చేయాలన్న కేంద్రభద్రతా సంస్థలు పొరుగునున్న నొయిడా, ఘజియాబాద్ , గుడ్ గావ్ లోనూ ముందస్తు జాగ్రత్త చర్యలు చేపట్టాలని నిర్దేశించాయి.
ఉగ్రదాడుల్ని నివారించేందుకు దాడి ప్రయత్నాల్ని తిప్పికొట్టేందుకు సర్వసన్నద్ధంగా ఉండాలని సూచించాయి. మరో 20రోజుల్లో స్వాతంత్ర్య దినోత్సవ వేడుకలు జరగనున్నవేళ.. దేశ రాజధానికి ఉగ్రముప్పు పొంచి ఉందన్న హెచ్చరికలు ఆందోళన కలిగిస్తున్నాయి.
