జమ్ము కశ్మీర్‌లో పోలీసును అత్యంత దారుణంగా కొట్టి చంపిన ఘటనను ఆ రాష్ట్ర ముఖ్యమంత్రి మెహబూబా ముఫ్తీ తీవ్రంగా ఖండించారు. ఇంతకంటే సిగ్గుమాలిన చర్య మరోటి ఉండదంటూ ఆమె మండిపడ్డారు.  జమ్ము కశ్మీర్‌ పోలీసులు దేశంలోనే ఉత్తమ పోలీసులు.  ఆందోళన కారులు తమ సొంత ప్రజలే కదా అని వాళ్లు నిగ్రహం ప్రదర్శిస్తున్నారు.  వాళ్ల సహనాన్ని పరీక్షించొద్దు.  ప్రజలు శాంతంగా ఉండాలని విజ్ఞప్తి చేస్తున్నా అని ముఫ్తీ పేర్కొన్నారు.

పోలీసు సిబ్బంది సహనం కోల్పోతే  తర్వాత జరిగే చర్యలు తీవ్రంగా ఉంటాయని, అప్పుడు వాళ్లను ఆపడం చాలా కష్టమని ఆమె పేర్కొన్నారు. ఈ సందర్భంగా ఆందోళన కారుణ్ని జీప్‌కు కట్టేసి, భారత సైన్యం ఎదురుదాడికి దిగిన ఉదంతాన్ని ఆమె గుర్తు చేశారు.

మరోవైపు నేషనల్‌ కాన్ఫెరెన్స్‌ పార్టీ (ఎన్‌సీపీ) అధినేత ఒమర్‌ అబ్దుల్లా ఈ ఘటన పట్ల ఆగ్రహం వ్యక్తం చేశారు. డిప్యూటీ సూపరిండెంట్‌ మహమ్మద్‌ ఆయుబ్‌ పండిత్‌ను చంపిన వాళ్లు నరకానికి వెళ్తారు, వాళ్లు చేసిన పాపానికి నరకంలో కాలిపోతారు  అని ఆయన ట్వీట్‌ చేశారు. వేర్పాటువాద నేత ఉమర్‌ ఫరూఖ్‌ కూడా పోలీస్‌ ను కొట్టి చంపడం క్రూరమైన చర్యగా పేర్కొన్నారు. ఇలాంటి అమానవీయ చర్యలకు పాల్పడితే సహించేది లేదని ఆయన ఆందోళనకారులను హెచ్చరించారు.

డిప్యూటీ సూపరిండెంట్‌గా పనిచేస్తున్న మహమ్మద్‌ ఆయుబ్‌ పండిత్‌‌ను గురువారం రాత్రి నౌహటా లో ఆందోళనకారులు అతి దారుణంగా కొట్టి చంపిన విషయం తెలిసిందే. ఆయన జమియా మసీదు ముందు ఫోటోలు తీసుకుంటుండగా.. ఆందోళనకారులు దాడికి దిగారు. దీంతో ఆయుబ్‌ పండిత్‌ తుపాకీతో కాల్పులు జరుపుతూ తప్పించు కోవడానికి ప్రయత్నించారు. అయినా, ఆయన్ని అడ్డుకున్న ఆందోళనకారులు ఆయుబ్ పండిత్‌ దుస్తులను చించి, ఆయణ్ని కొట్టి చంపేశారు. ఆ ప్రాంతంలోని పోలీస్‌ పికెట్లను కూడా ధ్వంసం చేశారు. ఈ ఘటనతో సంబంధం ఉన్న ముగ్గురు ప్రధాన నిందితులను గుర్తించామని, ఇద్దరిని ఇప్పటికే అరెస్టు చేశామని పోలీసులు తెలిపారు.

“Deeply disturbed & condemn the brutal act at Nowhatta.Mob violence & public lynching is outside the parameters of our values & religion” Mirwaiz Umar Farooq  11:53 AM - 23 Jun 2017 • Anantnag, Jammu And Kashmir

“Our police is one of the best police force in country, showing maximum restraint because they feel they're dealing with their own ppl” -  J&K CM 11:28 AM - 23 Jun 2017 • New Delhi, India