అమెరికా లోని మిస్సిసిప్పీ రాజధానిలోని ఓ నైట్ క్లబ్లో కాల్పుల మోత మోగింది. ఈ ఘటనలో ఓ వ్యక్తి మృతి చెందగా.. మరో ముగ్గురు గాయపడినట్లు అధికారులు తెలిపారు.
హిండ్స్ కౌంటీలోని జాక్సన్లో ఎం-బార్ స్పోర్ట్స్ గ్రిల్ వద్ద ఈ దుర్ఘటన జరిగిందని స్థానిక అధికారి ఒకరు తెలిపారు. ఈ ప్రమాదంలో 41ఏళ్ల కార్టెజ్ షెల్బీ అనే వ్యక్తి అక్కడిక్కడే చనిపోగా.. ముగ్గురికి గాయాలయ్యాయి. వీరిలో ఓ మహిళ కూడా ఉంది. గాయపడినవారిని చికిత్స కోసం స్థానిక ఆస్పత్రికి తరలించారు.
కాల్పులకు సంబంధించి అనుమానితుడి ఫొటోలను అధికారులు సామాజిక మాధ్యమాలలో పోస్ట్ చేశారు. నిందితుడ్ని గుర్తించేందుకు సాయపడాలని ప్రజలను కోరింది. ఘటన అనంతరం నిందితుడు బార్ నుంచి పారిపోయాడని, అతడు తమ కస్టడీలో లేడని స్పష్టం చేసింది.
