పాతికేళ్లుగా భారత అథ్లెటిక్స్ ప్రధానకోచ్గా పనిచేస్తోన్న బహదూర్ సింగ్.. ఆ పదవికి తాజాగా రాజీనామా చేశారు. భారతీయ క్రీడా ప్రాధికార సంస్థ వయసు పరిమితుల ఆధారంగా కాంట్రాక్టు పొడిగింపును నిరాకరించడం వల్ల బహదూర్ కోచ్గా వైదొలిగినట్లు తెలుస్తోంది. ఫిబ్రవరి 1995లో కోచ్గా జాతీయ శిబిరాల్లో చేరిన బహదూర్.. 25 ఏళ్లపాటు సుదీర్ఘంగా కోచ్గా వ్యవహరిస్తూ ఎక్కువ కాలం శిక్షకుడిగా పనిచేసిన ఘనతను సాధించారు. జాతీయ శిక్షణా శిబిరాల్లో కోచ్ల అత్యధిక వయసు పరిమితి 70కు మించి ఉండకూడదనే మార్గదర్శకాల ప్రకారం ఆ పదవిలో బహదూర్ కొనసాగించడానికి నిరాకరించింది క్రీడా మంత్రిత్వశాఖ.
2010లో ఢిల్లీ వేదికగా జరిగిన కామన్వెల్త్ క్రీడల్లో భారత్ రెండు స్వర్ణాలతో సహా 12 అథ్లెటిక్స్ పతకాలు సాధించింది. 2018లో జకార్తా వేదికగా జరిగిన ఆసియా క్రీడల్లో 8 బంగారు పతకాలు, 9 రజతాలతో పాటు ట్రాక్, ఫీల్డ్ పోటీల్లో 20 పతకాలు సాధించింది భారత్. విశ్వసనీయ సమాచారం మేరకు బహదూర్ కోచ్ పదవికి రాజీనామా చేసినా.. భారత అథ్లెటిక్స్కు సలహాదారునిగా ఉంటారని తెలుస్తోంది.
