మనకి రక్షణ కోసం పోలీస్ కావాలి అనుకుంటాం కానీ అదే పోలీస్ మన ఇంట్లో వద్దు అని అనుకుంటున్నారు ఈ కాలం అమ్మాయిలు . పోలీసు ఉద్యోగమంటే పెళ్లి కావడం లేదనే కారణంతో ఓ కానిస్టేబుల్ తన ఉద్యోగానికి రాజీనామా చేశాడు. రెండు నెలల తర్వాత అతడి రాజీనామాకు పోలీసు శాఖ ఆమోద ముద్ర వేసింది.ప్రభుత్వ ఉద్యోగం రావడం అంటే ఎంతో కష్టంగా మారింది. ఎక్కువగా పోలీసు శాఖలోనే ఖాళీల భర్తీ ప్రక్రియ జరుగుతోంది.
దీంతో బీటెక్, పీజీలు పూర్తి చేసిన వారు సైతం కానిస్టేబుల్ ఉద్యోగానికి దరఖాస్తు చేసుకుంటున్నారు. ఉద్యోగం వచ్చేంత వరకు బాగానే ఉంటుంది కానీ.. ఉన్నత చదువులు చదివి.. కానిస్టేబుల్ ఉద్యోగం చేస్తూ పెళ్లి సంబంధాల కోసం వెళ్తే.. కాస్త ఇబ్బందికర పరిస్థితి ఎదురవుతోంది.పని ఒత్తిడి ఎక్కువనే కారణంగా పోలీసు సంబంధాలను వదులుకుంటున్న అమ్మాయి తరఫు వాళ్లూ ఉంటున్నారు. ఇలాంటి పరిస్థితే బీటెక్ చదివి, కానిస్టేబుల్‌గా పని చేస్తున్న సిద్ధాంతి ప్రతాప్‌‌కు ఎదురైంది. దీంతో ఆయన పెళ్లి కావడం లేదంటూ రెండు నెలల క్రితం తన ఉద్యోగానికి రాజీనామా చేశారు.
వివరాల్లోకి వెళ్తే.. సిద్ధాంతి ప్రతాప్ చార్మినార్ పోలీస్ స్టేషన్లో కానిస్టేబుల్‌గా పని చేస్తున్నారు. ఇటీవల ఓ పెళ్లి సంబంధానికి వెళ్లగా.. కానిస్టేబుల్ కదా.. 24 గంటలూ పని ఉంటుందంటూ.. అమ్మాయి తిరస్కరించింది. దీంతో హైదరాబాద్ పోలీస్ కమిషనర్ అంజనీకుమార్‌కు ప్రతాప్ రాజీనామా లేఖ రాశారు. ఇంజినీరింగ్‌ పూర్తి చేసిన తాను పోలీస్ శాఖపై ఉన్న మక్కువతో నాలుగేళ్ల కిందట కానిస్టేబుల్‌గా చేరానని చెప్పాడు.
కానిస్టేబుల్‌గా ఉద్యోగంలో చేరిన వారికి సర్వీస్‌ ప్రకారం పదోన్నతులు లభించడం లేదని అంజనీ కుమార్‌కు రాసిన లేఖలో ప్రతాప్ ఆవేదన వ్యక్తం చేశారు. 20 ఏళ్లు పనిచేసినా కానిస్టేబుల్, హెడ్‌ కానిస్టేబుల్‌గానే ఉండాల్సి వస్తోందన్నారు.
