డ్రంక్ అండ్ డ్రైవ్ ఈజ్ యాన్ అఫెన్స్.అత‌డు తాగి త‌చ్చాడాడు. మ‌నంద‌రి డ్రైవింగ్ ఫోర్స్ గా మారాడు. డూ ఆర్ డై సిట్యువేష‌న్ క్రియేట్ చేశాడు. ఇది త‌ప్పా! ఒప్పా! గుర్తు ప‌ట్టు లేదా ఓ ప‌ట్టు ప‌ట్టు శ్రీ‌శ్రీ యాడ‌న్నుడో.. అత‌డి యాది ఏమ‌న్న‌దో.. ఆన్‌లైన్ ట‌పాల గోల‌కేంగాని.. అచ్ఛంగా నీకు అర్థ‌మ‌య్యాడా అత‌డు విస్ఫోట‌నం. ఎవ‌డెవ‌డో వ‌చ్చాడు పోయాడు కానీ యుగానికొక్క‌డుగా నిలిచాడు. శ‌బ్దార్థ స‌హితంగా కొంద‌రికే అర్థ‌మయ్యా డు.


రాత్రి నువ్వు బాగా ఆలోచిస్తున్నావా..ఐతే అత‌డు నీకు బ‌హుళ పంచ‌మి జ్యోత్స్న‌లా భ‌యపెడ‌తాడు.. పరుగులెత్తిస్తాడు.ప్ర‌జ‌ల భాష‌కు కావ్య గౌర‌వం వ‌చ్చిన వేళ సంతోషిస్తాడు.ఇప్పుడు విశాఖ రోడ్ల‌న్నీ నిశ్శ‌బ్దం పాటిస్తున్నాయ్‌.అదిగో ఆర్ కే బీచ్ చెంత శ్రీ‌శ్రీ ధూళి ప‌ట్టి ఉన్నాడు. ఈ ఒక్క రోజే సోకాల్డ్ జాతి నిన్ను స్మ‌రింతు .సోకాల్డ్ శున‌కాలు ప‌హారా కాయు. అటుపై నీ సంగ‌తి నీ సంత‌తి ఇంతే సంగ‌తి చిత్త గించ‌వలె.వినుతి.. ప్రేమా నికి .. ఘూకం కేక‌..బేకం బాక .. ఆర్ణ‌వం.. కంకాళం.. వైప్ల‌వ్యం..ఇంకా కొన్ని .. సంక్లిష్టాలు.. సంశ్లిష్టాలు .. మ‌మ్మ‌ల్ని వేధిస్తాయ్‌. గాజు క‌ళ్ల గుడ్డి లోకం గురించి వ్య‌క్తావ్య‌క్తంగా ప్రేలాపిస్తాయ్‌. ఓరినాయినోయ్‌! ఎక్క‌డి నుంచి ఎక్క‌డి దాకానో వెళ్లిపోతున్న‌. ఎనీవేస్ అత‌డు శ్రీ నుంచి శ్రీ వ‌ర‌కు ప్ర‌వ‌హించిన‌ వాడు.దెయ్యం గురించి / భూతం గురించి / య‌జ్ఞోప‌వేతం గురించి తెలిసిన‌వాడు. సంప్ర‌దాయ చంధో రీతులు ల‌యం చేసుకున్న వాడు. ప‌ద‌ల‌య‌విన్యాసం చేయ‌ గ‌ల‌వాడు. ప్ర‌యోగ వాదాన్ని వినిపించ‌గ‌ల‌వాడు. వాడు మ‌న‌వాడు.ఇంకా ఏవేవో .. ఎన్నెన్నో..ఆలోచిస్తే.. "అగాధ‌మౌ జ‌ల‌నిధిలోన ఆణిముత్య‌మున్న‌టులే.. శోకాల మాటున దాగి సుఖ‌మున్న‌దిలే.. " క‌వీ! నీకో న‌మ‌స్సు.


"విన్నాన‌మ్మా విన్నాను నే విన్న‌వి క‌న్న‌వి వినుతించ‌గ‌బోగ‌.. " అన్న నీకు న‌మ‌స్సు. దండం తండ్రీ! ఎప్పుడో ఆదేశించావుగా.. "ఎముక‌లు కుళ్లిన వ‌య‌స్సు మ‌ళ్లిన సోమ‌రులారా చావండి " అని..మ‌రెందుక‌ని మాలో కొంద‌రు చావ‌క బ‌తుకుతున్నారు. ఏదేమైనా నువ్వొక లేటు నైటు ఘాటు ప్రేమ‌వి.. విప్పార్చిన క‌ళ్ల‌కు ప్ర‌పంచాన్నొక దుర్గ‌మంగా మ‌లిచిన‌వాడివి. కొంత‌కాలం ఆగితే నీలాంటోడు వ‌స్తాడ‌న్నారు.రాడు గాక రాడు. ఆరుద్ర‌కు అంత సీన్ లేదని తేల్చేశారెవ్వ‌రో.. ఆత్రేయ పాట త‌ప్ప మాట త‌ప్ప త‌ప్పనిస‌రిగా అయినా క‌విత్వం రాయ లేదు గాక రాయ‌లేదు. ఇంకెవ్వ‌రున్నార‌ని.. కొంద‌రు వ‌చ్చారు కానీ నువ్వొక్క‌డివే గొప్పోడివ‌ని తీర్మానించేశారు.

 

గొప్పోడివి గ‌నుక ఓ చిన్న ప్ర‌శ్న‌.. మ‌ళ్లీ అక్ష‌రాలతో క‌వాతు ఎప్పుడు చేస్తావ‌ని? అధివాస్త‌విక‌త ఎప్పుడు వినిపిస్తావ‌ని? ఏది స‌త్యం ఏది అస‌త్యం అని ఎప్పుడు నిన‌దిస్తావ‌ని? ఎవ‌డో అన్నాడు క‌విత్వం వ‌చ్చి చాలా కాలం అయ్యింద‌ట‌! ఇంకెవ‌రో సందేహించారు వ‌చ‌నం అయినా రాయండి క‌విత్వం అయినా రాయండి అయినా ఈ రెండింటికీ చెంద‌ని విధంగా ఈ వ‌చ‌న క‌విత్వం ఏంట‌బ్బా అని..ఇంత‌టి ఆందోళ‌నల మ‌ధ్య నీతో పాటు న‌డ‌యాడిన కృష్ణ‌శాస్త్రి, దాశ‌ర‌థి వ‌గైరా..వ‌గైరా క‌వుల‌నీ తీసుకురా. రా.. ఆకాశ‌మార్గాన ఉన్న తెలుగు వైభ‌వాన్ని భూమార్గం ప‌ట్టించు. అదిగ‌దిగో.. జ‌గ‌న్నాథ ర‌థ‌చ‌క్రాల్‌. తోడ్కొన‌గ రా.. దేవుడి చేసిన మ‌నుషులనీ / మ‌నుషులు చేసిన దేవుడునీ ప్ర‌శ్నించ‌గ రా.. నాథ హ‌రే జ‌గ‌న్నాథ హ‌రే!
సంద‌ర్భం : ఏప్రిల్ 30 శ్రీ‌శ్రీ జ‌యంతి


ర‌త్న‌కిశోర్ శంభుమ‌హంతి

మరింత సమాచారం తెలుసుకోండి: