తెలంగాణలో కొన్నాళ్లుగా పెద్దగా నోటిఫికేషన్లు లేవు.. మరోవైపు ఏపీలో జగన్ సీఎం అయిన దగ్గర నుంచి ఒకటే ఉద్యోగాలు.. ముందేమో గ్రామవాలంటీర్లు అన్నారు.. అవో 3,4 లక్షల ఉద్యోగాలు ఇచ్చారు. ఆ తర్వాత ఇప్పుడు సచివాలయ ఉద్యోగాల పేరుతో అవో లక్షన్నర ఉద్యోగాలు ఇచ్చారు.
దీంతో తెలంగాణ నిరుద్యోగుల్లో మాకేమీ నోటిఫకేషన్లు లేవా అన్న నిరాశ మొదలైంది. ఈ సమయంలో కేసీఆర్ దాదాపు మూడు వేల ఉద్యోగాలకు నోటిఫికేషన్ ఇచ్చారు. తద్వారా కేసీఆర్ నిరుద్యోగులకు శుభవార్త చెప్పారు. ఈ ఉద్యోగాలన్నీ విద్యుత్‌ శాఖకు సంబంధించినవి కావడం విశేషం.
టీఎస్‌ ఎస్పీడీసీఎల్‌లో మొత్తం 2,939 ఉద్యోగాలను భర్తీ చేసేందుకు తెలంగాణ ప్రభుత్వం ఉత్తర్వులు జారీ చేసింది. ఈ ఉద్యోగాల్లో మొత్తం మూడు రకాలు ఉన్నాయి. అవి జూనియర్ లైన్ మెన్, కంప్యూటర్ ఆపరేటర్, జేపీవో.
ఈ మూడు ఉద్యోగాల్లో అత్యధికంగా జూనియర్ లైన్ మెన్ ఉన్నాయి. అవి ఏకంగా 2,438 జూనియర్ లైన్‌మెన్‌ ఉద్యోగాలు ఉన్నాయి. వీటి తర్వాత అత్యధికంగా 477 కంప్యూటర్ ఆపరేటర్ ఉద్యోగాలు ఉన్నాయి. ఇక జేపీవో పోస్టులు కేవలం 24 మాత్రమే ఉన్నాయి.
