మనం ఏ పని మొదలుపెట్టినా ఆత్మ విశ్వాసాన్ని పెంపొందించుకుంటే మాత్రమే విజయాలు మనకు సొంతం అవుతాయి. జీవితంలో ఎప్పుడూ చుట్టూ ఉండే వాళ్లు మన గురించి ఏమనుకుంటున్నారో అని ఆలోచిస్తూ ఆత్మ విశ్వాసాన్ని దెబ్బ తీసుకోకూడదు. ఇతరులు ఏం అనుకుంటున్నారో అని ఆలోచించకుండా మీ ప్రాధాన్యతలను మీరు ఆలోచించుకోవాలి. మీ బలాలు, బలహీనతలు తెలుసుకొని బలహీనతలు తగ్గించుకోవటంపై పూర్తి ఏకాగ్రత పెట్టాలి.
కమ్యూనికేషన్ నైపుణ్యాలు, వస్త్రధారణ, సాంఘిక నైపుణ్యాలను మెరుగుపరచుకోవాలి. మన అపజయాన్ని కోరుకునే వారికి ఆకతాయి పనులకు మీరు జంకరని, మీరు ఘటికులని తెలిసే విధంగా చేయాలి. చిన్న చిన్న విజయాలు ప్రయోజనాన్ని చేకూర్చటంతో పాటు ఆత్మవిశ్వాసాన్ని పెంపొందించటంతో సహాయపడతాయి. ప్రతిరోజు కొత్త విషయాలను నేర్చుకోవటంతో పాటు ఆ విషయాలపై అవగాహన పెంచుకోవటం ద్వారా ఆత్మవిశ్వాసం పెరుగుతుంది.
ప్రతి మనిషికి తనపై తనకు నమ్మకం ఉంటే మాత్రమే విజయాలు సొంతం అవుతాయి. మనలో ఎంతో ప్రతిభ ఉండి ఆత్మవిశ్వాసం లేకపోతే ఏ రంగంలో కూడా మనం సరిగ్గా రాణించలేము. ఆత్మవిశ్వాసం అనేది మనం అనుకున్న పనిని అనుకున్న విధంగా సాధించడానికి శక్తివంతమైన ఔషధంలా పని చేస్తుంది. మనపై మనం అనవసర అనుమానాలను పెంచుకుంటే ఆత్మ విశ్వాసం దెబ్బ తినే అవకాశం ఉంది. అనుమానాలను తొలగించుకొని ఆత్మ విశ్వాసాన్ని పెంచుకుంటే జీవితంలో మనం విజేతగా నిలబడవచ్చు.
