జీవితంలో చేసే ఏ పనిలోనైనా విజయం సాధించాలంటే మన లక్ష్యాన్ని మనం ప్రేమించాలి. లక్ష్యాన్ని ప్రేమిస్తే ఆ లక్ష్య సాధన దిశగా అడుగులు వేస్తే విజయం తప్పకుండా సొంతమవుతుంది. లక్ష్యాన్ని నిర్దేశించుకొని కృషి, పట్టుదల, అంకితభావంతో కష్టపడితే ఏ పనిలోనైనా విజయం సాధించవచ్చు. చాలా మంది లక్ష్యాన్ని సాధించటం కొరకు చాలా కష్టపడుతున్నామని కానీ విజయం దగ్గరగా వచ్చి వెళ్లిపోతుందని చెబుతూ ఉంటారు.
లక్ష్యాన్ని ప్రేమించి లక్ష్యం దిశగా కష్టపడుతూ విజయం సాధించలేకపోతున్నామంటే మన ప్రణాళికలో ఎక్కడో లోపం ఉందని గ్రహించాలి. తప్పు ఎక్కడ జరిగిందో గుర్తించి ఆ తప్పులు, పొరపాట్లు పునరావృతం కాకుండా కష్టపడాలి. మనం సాధించాలని అనుకున్న లక్ష్యానికి కావాల్సిన నైపుణ్యాలను అలవరచుకోవాలి. నైపుణ్యాలను అలవరచుకోవటమే కాకుండా లక్ష్యాన్ని చేరుకోవడానికి కావాల్సిన అలవాట్లను నేర్చుకోవాలి.
నిర్దేశించుకున్న లక్ష్యం పట్ల ఎల్లప్పుడూ దృఢంగా ఉండాలి. లక్ష్య సాధనలో ఎదురవుతున్న ఆటంకాలను ఎదుర్కొంటూ ముందడుగు వేయాలి. లక్ష్యాన్ని ఎప్పుడూ కష్టంగా భావించకుండా మన లక్ష్యాన్ని మనం ఇష్టపడితే సులువుగా లక్ష్యాన్ని సాధించవచ్చు. లక్ష్య సాధనకు మనలో ఉన్న బలహీనతలు అడ్డంకులుగా ఉంటే ఒక్కో బలహీనతను అధిగమిస్తూ విజయం సాధించాలి. మనకున్న పరిమితులతోనే లక్ష్యాన్ని సాధించి విజయాన్ని సొంతం చేసుకోవాలి. ఇష్టంతో, ప్రేమతో లక్ష్యం కోసం కష్టపడితే విజయాలను సొంతం చేసుకోవడం అసాధ్యమేమీ కాదు.
