జీవితంలో ఆనందం అంటే ఏంటి.. ఆనందం ఎలా పొందాలి.. ఆనందం ఎప్పుడు కలుగుతుంది.. ఇవన్నీ చిక్కు ప్రశ్నలే.. సాధారణంగా ఎప్పుడు ఆనందం కలుగుతుంది. మనకు సంబంధించి ఏదైనా శుభవార్త విన్నప్పుడు ఆనందం కలుగుతుంది. మనకు ఏదైనా మంచి జరిగినప్పుడు ఆనందం కలుగుతుంది.
వ్యాపారంలో లాభం వస్తే ఆనందం.. పిల్లాడికి మంచి మార్కులు వస్తే ఆనందం. అనుకోకుండా ధనలాభం కలిగితే ఆనందం.. ఎప్పటి నుంచి ఉన్న సమస్య తొలగిపోతే ఆనందం.. ఇలాంటి మనకందరికీ అనుభవమే. కానీ గమనించారో లేదో.. ఇవన్నీ మనకు సంబంధించినవే.
అయితే మనకు సంబంధించకుండా మనకు ఆనందం కలిగించే విషయాలూ కొన్ని ఉంటాయి. ఉదాహరణకు ఎవరికైనా సాయం చేస్తే.. కలిగే ఆనందం వేరు. ఆ సాయం కూడా ప్రతిఫలం ఆశించకుండా చేస్తే ఇంకా ఎక్కువ ఆనందం కలుగుతుంది. కష్టాల్లో ఉన్నవారిని ఆదుకుంటే ఆనందం లభిస్తుంది.
సమస్యల్లో చిక్కుకున్న వారికి చేయందిస్తే ఆనందం కలుగుతుంది. ఇక్కడ లభించే ఆనందం మీకూ.. అలాగే మీతో సాయం పొందిన వారికీ లభిస్తుంది. ఇలాంటి ఆనందం విలువ చాలా ఎక్కువ. కావాలంటే మీరూ ప్రయత్నించి చూడండి. అది మీకూ అనుభవంలోకి వస్తుంది.
