సంతోషంగా సాగిపోయే కుటుంబం.. చంటి (సత్యరాజ్) ఇంటి పెద్దగా ఉంటాడు ఆయన భార్య రేవతి తన నలుగురు తమ్ముళ్ళు కలిసి ఉంటారు. ఆ నలుగురిలో పెద్దోడు రావు రమేష్. అందరం సమానంగా కష్టపడుతున్నా పెత్తనం అంతా బావ చూడటం రావు రమేష్ కు ఇష్టం ఉండడు. ఇక ఎప్పుడు ఏ కన్ ఫ్యూజ్ లేకుండా హ్యాపీగా ఉండే సత్యరాజ్ కొడుకే హీరో మహేష్ బాబు. నలుగురు మామయ్యలు, అత్తమ్మలతో సరదాగా కబుర్లు చెబుతూ వారితో ఆడుకుంటాడు.
ఎక్కడైనా ఓ నలుగురు కలిస్తేనే అందం ఆనందం.. అలాంటిది పదిమంది ప్రతిరోజు కలుస్తుంటే అదే బ్రహ్మోత్సవం అంటూ ట్రైలర్ లో చెప్పినట్టుగా ఎక్కడో ఉన్న చుట్టాలందరు కలవాలి.. పండుగకో పబ్బానికో కలుసుకోవాలి అని చెప్పే కథ ఈ బ్రహ్మోత్సవం. తన మేన మామ తండ్రిని ఎదురించి వెళ్లడంతో జీవితం దాని విలువ.. చుట్టాలు వారి మూలాలు వెతుక్కునే మార్గంలో ఎలాంటి సంఘటనలు ఎదురయ్యాయి.. అన్నదే అసలు కథ.
సూపర్ స్టార్ మహేష్ సినిమా అనగానే ఆయన పాత్రే సినిమాకు హైలెట్ గా నిలుస్తుంది అని ప్రత్యేకంగా చెప్పాల్సిన పనిలేదు. ఓ తండ్రికి తగ్గ తనయుడిగా జీవితం విలువ చుట్టాలు వారి గురించి వెతికే మార్గం.. అన్నిటిలో మహేష్ అద్భుతంగా చేశాడు. అంతేకాదు సినిమాలో ఇద్దరి హీరోయిన్స్ తో లిప్ లాక్ చేసి అందరికి షాక్ ఇచ్చాడు మహేష్. ఇక కాశి అన్నపూర్ణ (కాజల్) కూడా తన పాత్రకు తగ్గ నటన కనబరించింది. కుటుంబం కోసం కుటుంబంతో కలిసి ఉండే మహేష్ ముందు కాజల్ కు కనెక్ట్ అయినా ఆ తర్వాత ఆమె మహేష్ కు దూరంగా వెళ్తుంది. ఇక తన చెల్లి స్నేహితురాలిగా లండన్ నుండి వచ్చిన సమంత అచ్చం మహేష్ ఎలా అలోచిస్తాడో అలానే ఆలోచించే పాత్రలో అదరగొట్టింది. తన క్యూట్ యాక్టింగ్ తో సమంత మరోసారి ప్రేక్షకులను అలరించింది.
ఇక సత్యరాజ్ పాత్రలోనే కథ జీవాన్ని చెప్పే ప్రయత్నం చేశాడు దర్శకుడు శ్రీకాంత్ అడ్డాల. ఆ పాత్రకు ఆయనే పర్ఫెక్ట్ అనిపించుకున్నారు. ఇక తెర మీద కన్నుల పండుగగా రేవతి, జయసుధ, నరేష్, శియాజి షిండే, కృష్ణ భగవాన్ అందరు తమ పాత్రల మేరకు నటించారు. ఇక ప్రత్యేకంగా చెప్పాల్సిన పాత్ర రావు రమేష్ గురించి.. కనీసం ఓ సారి కూడా నవ్వడం ఎరుగని పాత్రలో రావు రమేష్ అదరగొట్టాడు. సినిమాలో మహేష్ బాబు, రావు రమేష్ ల నటనే సినిమాకు హైలెట్ అని చెప్పొచ్చు. ఇక సెకండ్ హాఫ్ లో మహేష్ చుట్టంగా లిల్లిగా వెన్నెల కిశోర్ నవ్వులు పండించాడు.
కథ చెప్పే సినిమా కాస్త నెమ్మదిగా అర్ధమవుతుంది.. అయితే ఇలాంటి సినిమాలు తీయడం కత్తి మీద సాము లాంటిది. తన కుటుంబం చీలకుండా కాపాడుకోవడంలో తండ్రి విఫలమవడం.. కొడుకు తన కుటుంబమే కాదు తన ఇంటి పేరు ఉన్న అందరు చుట్టాలని కలుసుకునే కథ రాయడం గొప్ప విషయం. అయితే దర్శకుడు కేవలం సినిమా కథ మీద దృష్టి పెట్టి కథనంలో కొన్ని పొరపాట్లు చేశాడు. మహేష్ లాంటి స్టార్ హీరో సినిమాల్లో ఉండాల్సిన కమర్షియల్ ఎలిమెంట్స్ ఇందులో లేకుండా చేశాడు. దర్శకత్వం పరంగా ఓకే అనిపించుకున్నా ఎక్కడో శ్రీకాంత్ అడ్డాల సినిమాలో క్లారిటీ మిస్ అయినట్టు అనిపిస్తుంది.
ఇక సినిమా ఇంత కలర్ఫుల్ గా రాడానికి కరణమైన కెమెరామన్ రత్నవేలు గురిచి ప్రత్యేకంగా మాట్లాడాలి. టాలీవుడ్ లోనే కాదు ఇండియన్ టాప్ మోస్ట్ బెస్ట్ సినిమాటోగ్రాఫర్స్ లో రత్నవేలు ఒకరు అని చెప్పడంలో ఎలాంటి సందేహం లేదు. సినిమా ప్రతి ఫ్రేమ్ అద్భుతంగా చిత్రీకరించారు. మిక్కి జె మేయర్ సంగీతం సినిమాకు ప్లస్ అనే చెప్పాలి. తోటాతరణి గారి సెట్స్ కూడా అబ్బురపరిచాయి. ఎడిటర్ కోటగిరి వెంటకటేశ్వర రావు ఎడిటింగ్ పర్వాలేదు కాని సినిమా ఇంకాస్త ట్రిమ్ చేసుంటే బాగుండేది. ఇక పివిపి బ్యానర్ ప్రొడక్షన్ వాల్యూస్ ప్రతి ఫ్రేంలో కనిపిస్తున్నాయి. తన బ్యానర్ కు ఉన్న రిచ్ నెస్ ఎక్కడ పోకుండా చూసుకున్నారు నిర్మాత పరం వి పొట్లూరి.