ఈ మధ్య మల్టీస్టారర్ సినిమాల ట్రెండ్ నడుస్తుంది. మారుతున్న కాలం దృష్ట్యా ప్రజల ఆలోచనా, రుచుల విధానం మారడంతో ఇక హీరోలు సైతం రొటీన్ కు భిన్నంగా కథలతో పాటు, స్క్రీన్ ను సైతం ఇతర హీరోలతో షేర్ చేసుకుంటున్నారు. ఇది మాత్రమే కాకుండా అటు నిర్మాతలకు సైతం లాభాల పంట పండుతుండడంతో వారు కూడా ఖర్చుల విషయంలో వెనుకాడడంలేదు.
తాజాగా దర్శకధీరుడు రాజమౌళి దర్శకతంలో జూనియర్ ఎన్టీఆర్, రాంచరణ్ నటిస్తున్న సంగతి తెలిసిందే. అయితే తాజాగా రాంచరణ్ మరో హీరోతో కలిసి మల్టీస్టారర్ లో నటించబోతున్నట్లు వార్తలు వచ్చాయి. ఆయనే మహానటిలో నటించి మంచి మార్కులు కొట్టేసిన మలయాళ హీరో దుల్కర్ సల్మాన్. కె చక్రవర్తి రచయితగా కెయస్ రవిచంద్ర దర్శకత్వంలో తెలుగు, తమిళ భాషల్లో నిర్మితమవబోతున్న ఈ సినిమాలో వీరిద్దరూ నటించబోతున్నట్లు వార్తలు వచ్చాయి.
అప్పుడప్పుడూ తెలుగు ఛానెళ్లలో దుల్కర్ నటన గురించి వినపడుతుండడం, అంతకుమించి బెంగళూర్ డేస్ సినిమా లో దుల్కర్ నటనకు అందరూ ఫిదా అవడం మూలానా తెలుగు ప్రేక్షకులు ఈ చిత్రంపై ఆసక్తిని కనపరిచారు. అయితే రూమర్ల గురించి స్పందించిన దుల్కర్ టీం అవన్ని వట్టి పుకార్లేనని కొట్టిపడేసింది. అసలు అలాంటి చిత్రం నిర్మించబోతున్నారనే విషయం గురించి ఎక్కడా చర్చలు జరుగలేదని స్పష్టం చేసింది.
