బాలీవుడ్ ప్రేక్షకులు మాత్రమే కాదు, సినీ ప్రముఖులంతా దాదాపు సంవత్సరకాలంగా వెయిట్ చేసిన సంజయ్ దత్ బయోపక్ 'సంజు' శుక్రవారం ప్రపంచవ్యాప్తంగా గ్రాండ్‌గా విడుదలైంది. రాజ్ కుమార్ హిరానీ దర్శకత్వం వహించిన ఈ సినిమాకు ఊహించినదానికంటే ఎక్కువ రెస్పాన్సే వచ్చింది. అటు క్రిటిక్స్ నుండి, ఇటు కామన్ ఆడియన్స్ నుండి సినిమా మైండ్ బ్లోయింగ్ అనే కామెంట్స్ వినిపించాయి. అత్యంత భారీ ఎత్తున విడుదల అయిన ఈ సినిమా తొలి రోజున ప్రపంచవ్యాప్తంగా 5,300 స్క్రీన్ల మీద ప్రదర్శితం అయ్యిందని తెలుస్తోంది. వీటిల్లో 4000 స్క్రీన్లు ఇండియాలోకి కాగా, మిగతావి విదేశాల్లోనివి.
ఈ రకంగా చూస్తే ఇదొక రికార్డే. ఒకే భాషలో విడుదల అయిన సినిమా ఇన్ని స్క్రీన్ల మీద ప్రదర్శితం కావడం ఇండియా వరకూ రికార్డే. ఈ మధ్యనే వచ్చిన సల్మాన్ ఖాన్ సినిమా రేస్ త్రీ తొలి రోజున దాదాపు ముప్పై కోట్ల రూపాయల షేర్‌ను సాధించింది. రేస్ 3 కన్నా ఎక్కువ క్రేజ్ తో విడుదల అయిన సినిమా సంజూ. దీంతో దీని తొలి రోజు వసూళ్లు ముప్పై కోట్ల రూపాయల పైనే అని చెబుతున్నారు. రణబీర్ కపూర్‌కు గడిచిన ఐదేళ్లలో ఒక్క బ్లాక్ బస్టర్ కూడా లేదు.
అతడి కెరీర్లో బిగ్గెస్ట్ హిట్ 'యే జవానీ హై దివానీ'... 2013లో విడుదలైన ఈ చిత్రం అప్పట్లో రూ. 188 కోట్లు వసూలు చేసింది. ఇక సంజు సినిమా ట్రేడ్ వర్గాల ఎర్లీ ఎస్టిమేషన్స్ ప్రకారంఈ చిత్రం తొలి రోజు రూ. 40 కోట్ల వరకు వసూలు చేస్తుందని అంచనా వేస్తున్నారు. మరికొన్ని గంటల్లో కలెక్షన్స్‌కు సంబంధించి క్లియర్ నెంబర్స్ వెల్లడికానున్నాయి. ఈ సినిమాకు భారీ ఎత్తున ఓపెనింగ్స్ లభించాయి. ప్రీ రిలీజ్ లోనే భారీ ఎత్తున అడ్వాన్స్ బుకింగ్స్ నమోదయ్యాయి. హైదరాబాద్, బెంగళూరు వంటి దక్షిణాది పెద్ద నగరాల్లో కూడా అడ్వాన్స్ బుకింగ్స్ భారీ ఎత్తున కనిపించాయంటే వసూళ్ల స్థాయిని అర్థం చేసుకోవచ్చు.
2018లో ‘సంజు' మూవీ బాలీవుడ్ బిగ్గెస్ట్ ఓపెనింగ్స్ సాధించిన చిత్రంగా నిలవనుందని అంటున్నారు. ఫస్ట్ డే కెలక్షన్ పూర్తి వివరాలు బయటకు వచ్చిన తర్వాత ఎంత వసూలైంది? అనే విషయమై ఓ క్లారిటీ వచ్చే అవకాశం ఉంది. వన్ టైమ్ వాచబుల్ అనిపించుకుంది. దీంతో వీకెండ్లో కూడా భారీ వసూళ్లే ఉండనున్నాయి. వారాంతానికే ఈ సినిమా వంద కోట్ల రూపాయల షేర్‌ను సాధిస్తుందని అంచనా.
