ఎన్టీఆర్ ప్రస్తుతం రాజమౌళి డైరెక్షన్ లో నటిస్తున్న సంగతి తెలిసిందే. అయితే ఈ సినిమా తరువాత ఎవరితో ఎన్టీఆర్ చేస్తాడని అభిమానులు ఆసక్తిగా ఎదురుచూస్తున్నారు. కానీ ఆర్-ఆర్-ఆర్ తర్వాత కొరటాలతో ఎన్టీఆర్ ఓ సినిమా చేసే ఛాన్స్ ఉందంటూ ఎప్పట్నుంచో ప్రచారం సాగుతోంది. అందులో కొంత నిజం కూడా ఉంది. కానీ తారక్ మాత్రం మరోసారి త్రివిక్రమ్ కు ఓటేశాడు. అవును.. ఆర్-ఆర్-ఆర్ ప్రాజెక్టు తర్వాత కుదిరితే మరోసారి త్రివిక్రమ్ తో సినిమా చేస్తానని స్వయంగా ఎన్టీఆర్ ప్రకటించాడు.
పుట్టినరోజు సందర్భంగా రాత్రి తనను కలిసేందుకు ఇంటికొచ్చిన అభిమానులతో పిచ్చాపాటీ మాట్లాడిన తారక్, మాటల మధ్యలో ఈ విషయాన్ని బయటపెట్టాడు. ఎన్టీఆర్-త్రివిక్రమ్ కాంబినేషన్ లో అరవింద సమేత సినిమా వచ్చింది. వీళ్లిద్దరూ కలిసి చేసిన మొదటి సినిమా ఇదే. ఆ సినిమా రికార్డులు తిరగరాయలేదు. అలా అని ఫ్లాప్ కూడా కాదు. కానీ త్రివిక్రమ్ టేకింగ్ మాత్రం తారక్ కు నచ్చినట్టుంది.
పైగా అరవింద సమేత టైమ్ లోనే మరో సినిమా చేద్దామని ఇద్దరూ అనుకున్నట్టున్నారు. అందుకే ఆర్-ఆర్-ఆర్ తర్వాత త్రివిక్రమ్ కే ఛాన్స్ అవకాశం ఇచ్చాడు ఎన్టీఆర్. అయితే ఈ ప్రాజెక్టు ఫిక్స్ అని అప్పుడే చెప్పలేం. ఎందుకంటే ఇంకా ఏడాదికి పైగా సమయం ఉంది. ఈ గ్యాప్ లో ఎన్ని సమీకరణాలు మారుతాయో చూడాలి. పైగా చరణ్ కూడా త్రివిక్రమ్ తో సినిమా చేయాలని గట్టిగా ఫిక్స్ అయ్యాడు మరి.
