బాల నటుడిగా తెలుగు ప్రేక్షకులను మెప్పించి ఆ తరవాత లవర్ బాయ్‌గా అమ్మాయిల గుండెలను కొల్లగొట్టిన తరుణ్ ప్రస్తుతం సినిమాలకు చాలా దూరంగా ఉన్నారు. కారణం ఆయనకు అవకాశాలు లేకపోవడమే. ప్రస్తుతం ఆయన సొంతంగా వ్యాపారాలేవో చేసుకుంటున్నారు. ఇదిలా ఉంటే, తెలుగు టెలివిజన్‌లో ‘బిగ్ బాస్’ రియాలిటీ షో ఎలాంటి సెన్సేషన్ క్రియేట్ చేసిందో అందరికీ తెలిసిందే. తొలి సీజన్‌కు యంగ్ టైగర్ ఎన్టీఆర్ వ్యాఖ్యాతగా వ్యవహరించడంతో విపరీతమైన క్రేజ్ వచ్చింది. తెలుగు టీవీ చరిత్రలోనే అత్యధిక టీఆర్‌పీని ఈ షో రాబట్టింది.
సీజన్ 1 విజయవంతం కావడంతో రెండో సీజన్‌ను నిర్వాహకులు మరింత ప్రతిష్టాత్మకంగా తీసుకొని చేశారు. ఈ సీజన్‌కు నాని వ్యాఖ్యాతగా వ్యవహరించారు. అయితే ‘బిగ్ బాస్ 2’ను ప్రకటించినప్పుడు హీరో తరుణ్ ఒక కంటెస్టెంట్‌గా హౌజ్‌లోకి అడుగుపెట్టబోతున్నట్లు వార్తలు వచ్చాయి. వీటిని అప్పట్లో తరుణ్ ఖండించారు. తరుణ్ చెప్పినట్లో షోలో ఆయన భాగం కాలేదు. అయితే, ఇప్పుడు మరోసారి ఆయన పేరు తెరపైకి వచ్చింది. ప్రస్తుతం ‘బిగ్ బాస్’ సీజన్ 3కి ఏర్పాట్లు జరుగుతున్నాయి. రేపో మాపో అధికారికంగా ప్రకటన కూడా వస్తుందంటున్నారు. కింగ్ నాగార్జున హోస్ట్‌గా వ్యవహరించే అవకాశాలు మెండుగా ఉన్నాయి.
అయితే, ఈ ‘బిగ్ బాస్ 3’ని ఇంకా ప్రకటించక ముందే ఈ షోలో తరుణ్ ఒక కంటెస్టెంట్‌గా పాల్గొంటున్నారని వార్తలు వస్తున్నాయి. ప్రస్తుతం ఈ వార్త ఫిల్మ్ నగర్‌లో చక్కర్లు కొడుతోంది. నాగార్జున హోస్ట్ కావడంతో తరుణ్ కూడా ‘స్టార్ మా’ ఆఫర్‌కు ఓకే చెప్పారని అంటున్నారు. మరి ఈ వార్తలో నిజమెంతో తెలియాలంటే అధికారిక ప్రకటన వచ్చేంత వరకు ఆగాల్సిందే. ఇదన్నా నిజమవుతుందో లేదంటే ‘బిగ్ బాస్ 2’ మాదిరిగా జస్ట్ రూమర్‌గా మిగిలిపోతుందో చూడాలి!
