టాలీవుడ్ అందాల చందమామ కాజల్ పుట్టినరోజు నేడు. నేటి(జూన్ 19)తో ఆమె 33 సంవత్సరాలు పూర్తిచేసుకున్నారు. ‘లక్ష్మీకళ్యాణం’ చిత్రంతో టాలీవుడ్‌కు పరిచయమైన కాజల్ అతికొద్ది సమయంలోనే స్టార్ హీరోయిన్‌గా ఎదిగారు. ఇండస్ట్రీకి వచ్చి 12 ఏళ్లు పూర్తయినా ఇంకా ఆమె క్రేజ్ తగ్గలేదు. ఇటీవలే ‘సీత’ అనే చిత్రంతో తానేంటో నిరూపించారు. ఇంచుమించుగా టాలీవుడ్ యంగ్ హీరోలందరితోనూ నటించేసిన కాజల్.. తొలిసారి శర్వానంద్ సరసన చేస్తున్నారు.
యువ కథానాయకుడు శర్వానంద్, కాజల్ అగర్వాల్, కళ్యాణి ప్రియదర్శన్ హీరో హీరోయిన్లుగా తెరకెక్కుతోన్న చిత్రం ‘రణరంగం’. సుధీర్ వర్మ దర్శకత్వం వహిస్తున్నారు. సితార ఎంటర్‌టైన్మెంట్స్ బ్యానర్‌పై సూర్యదేవర నాగవంశీ నిర్మిస్తున్నారు. ఇప్పటికే ఈ చిత్రంలోని శర్వానంద్ లుక్‌ను విడుదల చేశారు. ఇప్పుడు కాజల్ పుట్టినరోజును పురష్కరించుకుని చిత్రంలోని ఆమె లుక్‌ను లాంచ్ చేశారు. కాజల్ బర్త్‌డే పోస్టర్‌ను విడుదల చేశారు. ఈ పోస్టర్‌లో కాజల్ క్రేజీ లుక్‌తో ఆకట్టుకుంటోంది. బీచ్ ఒడ్డున చాలా చిల్డ్‌గా కనిపిస్తోంది.
కాజల్ బర్త్‌డే పోస్టర్‌ను దర్శకుడు సుధీర్ వర్మ ట్వీట్ చేశారు. ‘మతిపోగొట్టే అందం, అందమైన హృదయం కలిగిన కాజల్ అగర్వాల్‌కు పుట్టినరోజు శుభాకాంక్షలు’ అని సుధీర్ వర్మ పేర్కొన్నారు. ‘రణరంగం’ కోసం కాజల్‌తో కలిసి పనిచేయడం గొప్ప అనుభూతినిచ్చిందని అన్నారు. ఇలాంటి సినిమాలు ఆమె ఇంకెన్నో చేయాలని కోరుకున్నారు.
