గత ఏడాది ఏకంగా హ్యాట్రిక్ డిజాస్టర్ లను చవి చూసిన మాస్ రాజా రవితేజ ప్రస్తుతం ఎక్కడికిపోతావు చిన్నవాడా ఫేమ్ వి ఐ ఆనంద్ డైరెక్షన్ లో తెరకెక్కుతున్న 'డిస్కోరాజా' లో నటిస్తున్నాడు. గత కొద్దీ రోజులనుండి ఈ సినిమా షూటింగ్ ఢిల్లీలో జరుగుతుంది. ఈ షెడ్యూల్ తరువాత తదుపరి షెడ్యూల్ స్విజ్జర్లాండ్ లో జరుగనుంది దాంతో సినిమా షూటింగ్ దాదాపుగా పూర్తి కానుంది. ఈచిత్రం యొక్క ఫస్ట్ లుక్ ను వినాయకచవితి కానుకగా సెప్టెంబర్ 2న విడుదల చేయనున్నారు. ఇక ఈ చిత్రాన్ని క్రిస్మస్ కానుకగా డిసెంబర్ 20న థియేటర్లలోకి తీసుకురానున్నారని సమాచారం. ఈరోజు ఈ రిలీజ్ డేట్ ను అధికారికంగా ప్రకటించే అవకాశాలు వున్నాయి.
ఇక అదే సమయంలో యంగ్ హీరో నితిన్ నటిస్తున్న భీష్మ అలాగే సుప్రీం హీరో సాయి ధరమ్ తేజ్ , ప్రతిరోజు పండగే సినిమాలు కూడా విడుదలకానున్నాయి. దాంతో ఈ క్రిస్మస్ కు బాక్సాఫీస్ వద్ద మంచి త్రిముఖ పోరు జరగనుంది. మరి ఈ పోరులో ఎవరు ఫైచేయి సాధిస్తారో చూడాలి. కాగా ఈముగ్గురి హీరోలకు ఈసినిమాల విజయం కీలకం కానుంది.
సైన్టిఫిక్ థ్రిల్లర్ నేపథ్యంలో ఎస్ ఆర్ టి ఎంటర్ టైన్మెంట్స్ బ్యానర్ ఫై నేల టిక్కెట్టు నిర్మాత రవి తాళ్లూరి నిర్మిస్తున్న డిస్కోరాజా లో నాభా నటేష్ , పాయల్ రాజ్ పుత్ , తాన్యా హాప్ కథానాయికలుగా నటిస్తున్నారు. తమన్ సంగీతం అందిస్తున్నాడు. రవితేజ డ్యూయెల్ రోల్ లో నటిస్తున్న ఈ చిత్రంలో తమిళ నటుడు బాబీ సింహ విలన్ గా నటిస్తున్నాడు. కాగా ఈ సినిమా ఫై రవితేజ భారీ ఆశలు పెట్టుకున్నాడు.
