ಸ್ಯಾಂಡಲ್ ವುಡ್ ನ ಹ್ಯಾಟ್ರಿಕ್ ಹೀರೋ ಶಿವರಾಜ್ ಕುಮಾರ್ ಅಭನಯದ ಆಯುಷ್ಮಾನ್ ಭವ ಸಿನಿಮಾದ ರಿಲೀಸ್ ಡೇಟ್ ಫಿಕ್ಸ್ ಆಗಿದ್ದು, ಸೆನ್ಸಾರ್ ಮಂಡಳಿಯಿಂದ ಯು/ಎ ಸರ್ಟಿಫಿಕೇಟ್ ಸಿಕ್ಕಿದೆ. ನವೆಂಬರ್ 1ರಂದೇ ತೆರೆಕಾಣಬೇಕಿದ್ದ ಚಿತ್ರ ತಾಂತ್ರಿಕ ಸಮಸ್ಯೆಯಿಂದಾಗಿ ಮುಂದೂಡಲಾಗಿತ್ತು. ಇದೀಗ ಎಲ್ಲವು ಸರಿ ಹೋಗಿದೆ. ಅಷ್ಟಕ್ಕೂ ರಿಲೀಸ್ ಡೇಟ್ ಇದೆ ನೋಡಿ.
ಆಯುಷ್ಮಾನ್ಭವ ಸಿನಿಮಾ ರಿಲೀಸ್ ಆಗುತ್ತಿರುವುದು ನ. 15ರಂದು. ವಿಶೇಷತೆ ಎಂದರೆ ಇದೇ ದಿನಾಂಕದಂದು ತೆರೆಕಂಡಿದ್ದ ಶಿವರಾಜ್ಕುಮಾರ್ ಗೆ ದೊಡ್ಡ ಬ್ರೇಕ್ ನೀಡಿದ್ದ ಜನುಮದ ಜೋಡಿ ಸಿನಿಮಾ ಕೂಡ ರಿಲೀಸ್ ಆಗಿತ್ತು ಎಂಬುದು ವಿಶೇಷ. 1996ರ ನ. 15ರಂದು ಜನುಮದ ಜೋಡಿ ತೆರೆಕಂಡಿತ್ತು. ಹ್ಯಾಟ್ರಿಕ್ ಹೀರೋ ಶಿವರಾಜ್ಕುಮಾರ್ ಕೈಲೀಗ ಸಾಲು ಸಾಲು ಸಿನಿಮಾಗಳು. 'ದಿ ವಿಲನ್' ಯಶಸ್ಸಿನ ನಂತರ ತೆರೆಕಂಡ 'ಕವಚ' ಮತ್ತು 'ರುಸ್ತುಂ' ಸಿನಿಮಾಗಳು ಅಷ್ಟೇನೂ ಸದ್ದು ಮಾಡಲಿಲ್ಲ. ಆದರೂ ಶಿವಣ್ಣನ ಕೈಯಲ್ಲಿ ಈಗ 5 ಸಿನಿಮಾಗಳಿವೆ. ಪಿ. ವಾಸು ನಿರ್ದೇಶಿಸಿರುವ 'ಆಯುಷ್ಮಾನ್ಭವ' ಮುಂದಿನ ವಾರ ತೆರೆಗೆ ಅಪ್ಪಳಿಸಲಿದೆ.
ಶಿವರಾಜ್ಕುಮಾರ್ ಜೊತೆಗೆ ರಚಿತಾ ರಾಮ್ ನಾಯಕಿಯಾಗಿ ನಟಿಸುತ್ತಿರುವ 'ಆಯುಷ್ಮಾನ್ಭವ' ಸಿನಿಮಾ ಕಳೆದ ವಾರವೇ ತೆರೆಕಾಣಬೇಕಿತ್ತು. ನವೆಂಬರ್ 1 ರಂದು ಕನ್ನಡ ರಾಜ್ಯೋತ್ಸವದಂದೇ ಈ ಸಿನಿಮಾವನ್ನು ತೆರೆಗೆ ತರಲಾಗುವುದು ಎಂದು ಚಿತ್ರತಂಡ ಆರಂಭದಲ್ಲಿ ಹೇಳಿತ್ತು. ಆದರೆ, ಕಾರಣಾಂತರ ಗಳಿಂದ ಚಿತ್ರ ಬಿಡುಗಡೆ ದಿನಾಂಕ ಮುಂದಕ್ಕೆ ಹೋಗಿತ್ತು. ಇದೀಗ ಸಿನಿಮಾದ ಬಿಡುಗಡೆಯ ದಿನಾಂಕವನ್ನು 'ಆಯುಷ್ಮಾನ್ಭವ' ಚಿತ್ರತಂಡ ಘೋಷಿಸಿದೆ. ಅನಂತ್ನಾಗ್, ಸಾಧುಕೋಕಿಲ, ಸುಹಾಸಿನಿ, ರಂಗಾಯಣ ರಘು, ನಿಧಿ ಸುಬ್ಬಯ್ಯ, ಅವಿನಾಶ್, ರಾಜೇಶ್ ನಟರಂಗ ಮುಂತಾದ ಕಲಾವಿದರು ನಟಿಸಿರುವ 'ಆಯುಷ್ಮಾನ್ಭವ' ಟ್ರೈಲರ್ ಮೆಚ್ಚುಗೆ ಗಳಿಸಿತ್ತು. 'ಆಪ್ತಮಿತ್ರ', 'ಆಪ್ತರಕ್ಷಕ', 'ದೃಶ್ಯ', 'ಶಿವಲಿಂಗ' ಮುಂತಾದ ಸಸ್ಪೆನ್ಸ್ ಸಿನಿಮಾಗಳನ್ನು ಕನ್ನಡಕ್ಕೆ ನೀಡಿರುವ ಪಿ. ವಾಸು 'ಶಿವಲಿಂಗ' ಸಿನಿಮಾ ಬಳಿಕ ಮತ್ತೊಮ್ಮೆ ಶಿವರಾಜ್ಕುಮಾರ್ಗೆ ಆ್ಯಕ್ಷನ್- ಕಟ್ ಹೇಳಿದ್ದಾರೆ. ಚಿತ್ರ ಅದ್ದೂರಿಯಾಗಿ ಹಿಟ್ ಪಡೆಯಲಿದೆ ಎಂಬುದು ನಿರ್ದೇಶಕರ ಮಾತಾಗಿದೆ.
