ఒక సినిమా పూర్తి అయి చాలా రోజులవుతున్నా థియేటర్లలోకి రాకపోతే ఆ సినిమా దర్శకుడికి, హీరోకి ఎలా ఉంటుందో ఊహించలేం. ముఖ్యంగా నిర్మాతకి చాలా నష్టం వస్తుంది. ఈ పరిస్థితి ముఖ్యంగా చిన్న సినిమాలకి ఎదురవుతుంది. ప్రతీ చిన్న సినిమా నిర్మాత, దర్శకుడు, హీరోలు ఇలాంటి పరిస్థితిని ఎదుర్కొంటారు. మొన్నటి వరకు హీరో నిఖిల్ కూడా ఇలాంటి పరిస్థితినే ఎదుర్కొన్నాడు.
నిఖిల్ నటించిన అర్జున్ సురవరం సినిమా ఓ ఆర్నెళ్ళ క్రితమే రిలీజ్ అవ్వాల్సింది. కానీ ఆర్థిక కారణాల వల్ల ఈ సినిమా రిలీజ్ అవలేదు. ఈ సినిమాకి వచ్చినన్ని రిలీజ్ డేట్లు మరే సినిమాకి రాలేదెమో! ప్రతీ విడుదల తేదీ ప్రకటించాక ఏవేవో కారణాల వల్ల వాయిదా పడేది. అయితే ప్రస్తుతం ఈ సినిమా ఈ నెల 29 వ తేదీన విడుదల అవనుంది. ఈ నేపథ్యంలో చిత్ర బృందం ట్రైలర్ ని విడుదల చేసి ప్రమోషన్స్ ని మొదలుపెట్టింది.
ఈ సినిమా తమిళ చిత్రమైన కణిథన్ చిత్రానికి రీమేక్. విడుదల అయిన ట్రైలర్ కి ప్రేక్షకుల నుండి మంచి స్పందన లభించింది. దీంతో చిత్ర యూనిట్ మరింత జోష్ తో ప్రమోషన్స్ లో పాల్గొంటుంది. నిఖిల్ ఇప్పటికే ఈ చిత్రం గురించి అభిమానులతో లైవ్ లో మాట్లాడాడు. అయితే విడుదల తేదీ దగ్గర పడడంతో సినిమాకి హైప్ తీసుకురావాలన్న ఉద్దేశ్యంతో ప్రీ రిలీజ్ ఈవెంట్ నిర్వహించనున్నారట.
ఈ ప్రీ రిలీజ్ ఈవెంట్ కి మెగాస్టార్ రానున్నాడని సమాచారం. ఠాగూర్ మధు సమర్పణలో తెరకెక్కిన ఈ చిత్రం కోసం మెగాస్టార్ రానున్నాడట. ఒకవేళ మెగాస్టార్ ఈ ఈవెంట్ కి హాజరయితే గనక నిఖిల్ సినిమాకి మంచి హైప్ వచ్చేసినట్టే. మరి ఏం జరుగుతుందో చూడాలి. నిఖిల్ కి చిరంజీవి సాయం చేస్తాడా లేదా చూడాలి.
