ప్రస్తుతం రామ్ గోపాల్ వర్మ కమ్మరాజ్యంలో కడప రెడ్లు సినిమా ప్రమోషన్లతో బిజీగా ఉన్నాడు. రేపు ఈ సినిమా విడుదల కాబోతుంది. హైకోర్టులో ఈ సినిమాపై ప్రజాశాంతి పార్టీ అధినేత కేఏ పాల్ పిటిషన్ దాఖలు చేశారు. ఈరోజు ఈ పిటిషన్ పై ఉత్తర్వులు వెలువడనున్నాయి. రామ్ గోపాల్ వర్మ ఈ సినిమా టైటిల్ మార్చాల్సి వస్తే అమ్మరాజ్యంలో కడప బిడ్డలు అనే టైటిల్ పెడతానని ప్రకటన చేశారు.
నిన్న రామ్ గోపాల్ వర్మ కమ్మరాజ్యంలో కడపరెడ్లు సినిమా విశేషాలను వెల్లడించడానికి విలేకరుల సమావేశం నిర్వహించారు. ఈ సినిమాలో నందమూరి బాలకృష్ణ పాత్ర లేదని రామ్ గోపాల్ వర్మ క్లారిటీ ఇచ్చారు. ఇప్పటికే కమ్మరాజ్యంలో కడపరెడ్లు సినిమాకు సంబంధించిన రెండు ట్రైలర్లు విడుదలయ్యాయి. కానీ ఈ రెండు ట్రైలర్లలో బాలయ్య పాత్ర ఎక్కడా కనబడలేదు. బాలయ్య పాత్ర ఈ సినిమాలో ఉంటుందా..? లేదా..? అనే అనుమానాలకు వర్మ సమాధానంతో క్లారిటీ వచ్చినట్లే అని చెప్పవచ్చు.
ఆంధ్ర రాజకీయాల్లో ప్రముఖులైన వారందరినీ రామ్ గోపాల్ వర్మ ఈ సినిమా ట్రైలర్లో చూపించాడు. సీఎం జగన్, చంద్రబాబు నాయుడు, కేఏ పాల్, నారా లోకేశ్, ఇతర ముఖ్య పాత్రలను ఈ సినిమాలో చూపిస్తున్న రామ్ గోపాల్ వర్మ బాలకృష్ణ పాత్రను మాత్రం చూపించకపోవడం గమనార్హం. మరోవైపు ఈ సినిమా సెన్సార్ సమస్యలను ఎదుర్కొంటున్నట్లు తెలుస్తోంది.
ఈ సినిమా విడుదలకు ఇంకా ఒక్కరోజు సమయం మాత్రమే ఉండటంతో ఈ సినిమా సెన్సార్ గండం దాటుతుందా...? లేదా...? చూడాల్సి ఉంది. వర్మ కొత్త టైటిల్ తో సెన్సార్ బోర్డ్ అనుమతి కొరకు వెళ్లనున్నారని సమాచారం. ఈ సినిమా సెన్సార్ గండాన్ని దాటితే రెండు తెలుగు రాష్ట్రాల్లో 800 థియేటర్లలో విడుదలవుతుంది. ఈ సినిమాపై రెండు తెలుగు రాష్ట్రాల ప్రజల్లో భారీగా అంచనాలు ఉన్నాయి.
