టాలీవుడ్ యంగ్ విజయ్ దేవరకొండ హీరోగా రూపొందుతోన్న రొమాంటిక్‌ ఎంటర్‌టైనర్‌ 'వరల్డ్ ఫేమస్ లవర్'. భిన్నమైన ప్రేమకథా చిత్రంగా రూపొందుతోన్న ఈ సినిమాలో హీరోయిన్స్‌ ఐశ్వర్యా రాజేష్‌, ఇజాబెల్లె లెయితె, క్యాథరిన్‌ థ్రెసా, రాశీ ఖన్నా నటిస్తున్నారు. ఈ నలుగురు హీరోయిన్స్‌ పాత్రలకు, హీరో పాత్రకు ఉన్న రిలేషన్‌ ఏంటనే ఆసక్తి అందరిలోనూ నెలకొంది. డిఫరెంట్‌ లుక్, డ్రెస్సింగ్‌ స్టైల్‌తో విజయ్ దేవరకొండ ఆకట్టుకుంటున్నారు.
ఇప్పటి వరకు ఐశ్వర్యా రాజేష్‌, ఇజాబెల్లె లెయితె, క్యాథరిన్‌ థ్రెసా లుక్స్‌ను చిత్ర యూనిట్‌ విడుదల చేశారు. ఇందులో భాగంగా తాజాగా రాశీ ఖన్నా లుక్‌ను హీరోతో ఆ పాత్రకు ఉన్న రిలేషన్‌ను తెలియజేస్తూ విడుదల చేశారు. రాశీ ఖన్నా పాత్ర పేరు యామిని.. దేవరకొండ పాత్ర పేరు గౌతమ్‌. ఐశ్వర్యాజేష్‌, క్యాథరిన్‌కు శీనయ్య, శ్రీనుగా.. ఇజాబెల్లె లెయితె, రాశీ ఖన్నాలకు గౌతమ్‌గా విజయ్ దేవరకొండ పాత్ర పరిచయం ఉంది. అయితే, విజయ్‌దేవరకొండ నాలుగు గెటప్స్‌లో కనపడటానికి, వేర్వేరు పేర్లతో పిలవడానికి ఉన్న కారణాలు మాత్రం సీక్రెట్. ఈ సీక్రెట్ తెలియాలంటే ఫిబ్రవరి 14 ఆగాల్సిందే.
ఇక 'వరల్డ్ ఫేమస్ లవర్'లో తన పాత్రకు సంబంధించిన పోస్టర్‌ను రాశీ ఖన్నా ట్విట్టర్ ద్వారా అభిమానులతో పంచుకున్నారు. అతన్ని నా ప్రపంచంగా చేసుకున్నాను. నా వరల్డ్ ఫేమస్ లవర్ గౌతమ్‌ను వేలంటైన్స్‌ డే సందర్భంగా కలుసుకుందాం' అంటూ రాశీ ఖన్నా ట్వీట్‌లో పేర్కొన్నారు. ఇక జనవరి 3న ఈ సినిమా టీజర్ విడుదల కానుంది. ప్రముఖ నిర్మాత కె.ఎస్‌.రామారావు సమర్పణలో కియేటివ్‌ కమర్షియల్స్‌ బ్యానర్‌పై క్రాంతి మాధవ్‌ దర్శకత్వంలో తెరకెక్కుతోన్న ఈ సినిమాకి కె.ఎ.వల్లభ నిర్మిస్తున్నారు. గోపీ సుందర్‌ సంగీతం సమకూరుస్తున్నారు. జయకృష్ణ గుమ్మడి సినిమాటోగ్రఫీ అందిస్తున్నారు. ఇక ఈ సినిమా తర్వాత విజయ్ దేవరకొండ డేరింగ్ అండ్ డాషింగ్ డైరెక్టర్ పూరి జగన్నాధ్ దర్శకత్వంలో ఫైటర్ అనే సినిమాలో నటించబోతున్నాడు.
