కంగనా రనౌత్ సిస్టర్స్ బాలీవుడ్ లో ఎప్పుడు ఎవరిని ఏకిపారేస్తారో ఎవరు ఊహించలేరు. చిన్న పాయింట్ దొరికితే చాలు బట్టలు విప్పి బజారులో నిల్చోపెట్టే స్థాయిలో చెలరేగిపోతారు. ఇక తాజాగా ప్రముఖ బాలీవుడ్ నిర్మాత మహేష్ భట్‌పై తీవ్ర స్థాయిలో ఆగ్రహం వ్యక్తం చేశారు కంగనా రనౌత్ సోదరి రంగోలీ చందేల్. పౌరసత్వ సవరణ బిల్లును వ్యతిరేకిస్తూ మహేష్ భట్ ఓ వీడియోను రిలీజ్ చేశారు. ఆ వీడియోను ఉద్దేశిస్తూ రంగోలీ షాకింగ్ వ్యాఖ్యలు చేశారు. ఆ వీడియోలో.. 'మీలో ప్రేమ లేకపోతే ఎన్ని దేవుళ్లను మొక్కినా, సామాజిక సేవలు చేసినా, పేదలకు సాయం చేసినా, రాజకీయాల్లోకి వచ్చినా, పుస్తకాలు రాసినా.. ఇలా ఎన్ని చేసినా మీరు చచ్చిన పాముతో సమానం. ప్రేమలేకపోతే సమస్యలు ఎదురవుతాయి. ఆ సమస్యలు రెట్టింపు అవుతూనే ఉంటాయి ' అని మహేష్ భట్ వెల్లడించారు.
పౌరసత్వ సవరణ బిల్లును వ్యతిరేకిస్తూ వీడియో రిలీజ్ చేసిన మహేష్‌పై ఆగ్రహం వ్యక్తం చేశారు బాలీవుడ్ నటి కంగనా రనౌత్ సోదరి రంగోలీ చందేల్. 'మహేష్ గారూ పుస్తకాలు చదవడం వల్ల పెద్ద విషయాలు మాత్రమే తెలుసుకోగలం. కానీ పెద్ద మనుషులం అవ్వం. వయసొచ్చిన కూతురిని ఒళ్లో కూర్చోబెట్టుకుని ముద్దాడుతూ ఫొటో తీయించుకున్న మీరా నీతులు చెప్పేది. మనం చేసే మంచి పనులతోనే పెద్దరికం వస్తుంది. దేశం కోసం మీరేం చేశారు? ఇలా ఉదార స్వభావం ఉన్నట్లు నటిస్తే ఇక కుదరదు. మిత్రురాలా.. విదేశీయులు భారతదేశంలో అడుగుపెట్టడం నచ్చని వారే మన శత్రువులు. మనం భారతమాతను రక్షించుకుందాం'. అంటూ రివర్స్ లో కామెంట్ చేసింది చందేల్.
కంగన కుటుంబానికి మహేష్ భట్ కుటుంబానికి అస్సలు పడదన్న సంగతి తెలిసిందే. ఒకప్పుడు కంగన, మహేష్ భట్ మంచి స్నేహితుల్లా ఉండేవారు. కానీ ఓ సినిమాలో నటించేందుకు కంగన ఒప్పుకోలేదని మహేష్ కంగనపై పగ పెంచుకున్నాడు. కంగన నటించిన సినిమా ఓ థియేటర్‌లో ఆడుతుంటే అదే థియేటర్‌కు వెళ్లి మహేష్ కంగనపై చెప్పు విసిరారు. అప్పటినుంచి కంగనకు మహేష్‌కు మధ్య వైరం ఏర్పడింది. మహేష్ భట్ కూతురైన ఆలియా భట్ అంటే కంగనకు, కంగన సోదరి రంగోలీకి విపరీతమైన కోపం. ఆలియా నటించిన 'గల్లీ బాయ్' ఆస్కార్‌కు వెళ్లినట్లే వెళ్లి ఆగిపోయింది. దీనిపై రంగోలీ స్పందిస్తూ.. హాలీవుడ్‌లో వచ్చిన '8 మైల్' అనే సినిమాను 'గల్లీ బాయ్' పేరుతో హిందీలో రీమేక్ చేశారు. 'ఉరి', 'మణికర్ణిక' సినిమాల్లాగా 'గల్లీ బాయ్' ఒరిజినల్ కంటెంట్‌తో తీసిన సినిమా కాదు. హాలీవుడ్ సినిమాను కాపీ కొడితే హాలీవుడ్ వాళ్లు పిలిచి మరీ ఆస్కార్ ఎందుకిస్తారు? అని ఏకిపారేశారు రంగోలీ. ఈ కామెంట్స్ చూసిన నెటిజన్స్ అంతా రంగోలీ కే సపోర్ట్ గా మాట్లాడటం ఇప్పుడు ఆసక్తికరంగా మారింది.
