సూపర్ స్టార్ మహేష్ బాబు నటిస్తున్న తాజా సినిమా సరిలేరు నీకెవ్వరు పై ఇప్పటికే ఆయన ఫ్యాన్స్ తో పాటు ప్రేక్షకుల్లో కూడా మంచి అంచనాలు ఉన్నాయి. అయితే ఇటీవల రిలీజ్ అయిన సాంగ్స్, టీజర్ ఆ అంచనాలను డబుల్ చేయడం జరిగింది. సూపర్ స్టార్ మహేష్ బాబు, మిలిటరీ మేజర్ అజయ్ కృష్ణ అనే రోల్ లో నటిస్తున్న ఈ సినిమాలో రష్మిక మందన్న హీరోయిన్ గా నటిస్తుండగా సీనియర్ నటి విజయశాంతి ఒక కీలక పాత్రలో నటిస్తోంది. యువ సక్సెస్ఫుల్ డైరెక్టర్ అనిల్ రావిపూడి దర్శకత్వం వహిస్తున్న ఈ సినిమాను మహేష్ బాబు,
దిల్ రాజు, అనిల్ సుంకర ఎంతో ప్రతిష్టాత్మకంగా నిర్మిస్తున్నారు. ఇకపోతే ఈ సినిమా ప్రీ రిలీజ్ ఈవెంట్ జనవరి 5న హైదరాబాద్ లోని లాల్ బహదూర్ స్టేడియంలో ఎంతో వైభవంగా జరుగనుంది. కాగా ఈ వేడుకకు మెగాస్టార్ చిరంజీవి ప్రత్యేకంగా విచ్చేస్తున్నారు. అతి పెద్ద మెగాసూపెర్ ఈవెంట్ గా సరిలేరు నిర్మాతలు దీనిని ప్లాన్ చేస్తున్నారు. అయితే నేడు కొన్ని టాలీవుడ్ వర్గాల నుండి అందుతున్న సమాచారం ప్రకారం, ఈ సినిమాకు సంబంధించి ఈనెల 9న మరొక ఈవెంట్ నిర్వహించనుందట సరిలేరు యూనిట్.
ఇప్పటివరకు ప్రతి సినిమాకు ఒక ప్రీ రిలీజ్ ఈవెంట్ చేయడం మనం చూసాం.
ఈ సినిమా కోసం రెండవ యూనిట్ ప్లాన్ చేస్తున్న యూనిట్, దానిని కూడా ఎంతో గొప్పగా నిర్వహించనుందట. ఆ ఈవెంట్ కు ప్రత్యేక అతిథిగా యంగ్ టైగర్ ఎన్టీఆర్ రానున్నట్లు సమాచారం. గత ఏడాది మహేష్ నటించిన భరత్ అనే నేను ప్రీ రిలీజ్ ఈవెంట్ కి ఎన్టీఆర్ విచ్చేసిన విషయం తెల్సిందే. కాగా మరొక్కసారి ఎన్టీఆర్ ని ఈ సినిమా సెకండ్ ఈవెంట్ కి ఆహ్వానిస్తే బాగుంటుందని యూనిట్ సభ్యులు యోచన చేస్తున్నారట. కాగా ప్రస్తుతం పలు మీడియా మాధ్యమాల్లో విస్తృతంగా ప్రచారం అవుతున్న ఈ వార్తపై అధికారిక ప్రకటన మాత్రం వెలువడాల్సి ఉంది....!!
