ఈ ఏడాది ప్రారంభంలోనే సంక్రాంతికి వచ్చి నాన్ బాహుబలి ఇండస్ట్రీ హిట్ కొట్టాడు అల్లు అర్జున్. స్టైలిష్ స్టార్ అనే పేరును అల.. వైకుంఠపురములో సినిమాతో సార్ధకం చేసుకున్నాడు. పాటల్లో, యాక్షన్ లో, నటనలో బన్నీని ఓ రేంజ్ లో చూపించాడు దర్శకుడు త్రివిక్రమ్. అత్తారింటికి దారేది తరహాలోనే మొదటి పది నిముషాల్లో సినిమా కథ చెప్పేసి ఆసక్తి రేపాడు ఈ మాటల మాంత్రికుడు. తర్వాత సినిమా ఆద్యంతం తన డైలాగులతో, టేకింగ్ తో ప్రేక్షకులను కట్టి పడేసి ఇండస్ట్రీ హిట్ చేసేశాడు. సినిమా వచ్చి నెల దాటిన తర్వాత ఇప్పుడు ఈ సినిమా కథ నాదేనంటూ ఓ రచయిత ఆరోపిస్తున్నాడు.
2003లో ఎన్టీఆర్ హీరోగా వచ్చిన నాగ సినిమాకు కథ అందించిన కృష్ణ అనే రచయిత అల.. కథ నాదే అంటున్నాడు. దర్శకుడు త్రివిక్రమ్ కు ఈ కథను కొన్నేళ్ల క్రితమే చెప్పానని అంటున్నాడు. కథ విన్న త్రివిక్రమ్ లైన్ బాగుందని అన్నాడని కూడా అంటున్నాడు. దాదాపు ఆరు నెలల క్రితం నా కథకు నిర్మాత కూడా దొరికాడని కానీ.. ఇలాంటి కథతోనే త్రివిక్రమ్ ఓ సినిమా చేస్తున్నాడని చెప్పాడని అంటున్నాడు. అయితే ఇది నా కథే అని తాను ఊహించలేకపోయానని అంటున్నాడు. దీనిపై ఫిలిం చాంబర్ లో తన గోడు చెప్పుకుంటున్నా ఎవరూ పట్టించుకోవటం లేదని ఆరోపిస్తున్నాడు.
ఈ విషయంలో తనకు అన్యాయం జరిగిందని అంటున్నాడు. నాకు ఎవరూ సాయం చేయటం నిస్సహాయ స్థితిలో ఉన్నానని చెప్పుకుంటున్నాడు. మరి ఇంతటి విమర్శపై త్రివిక్రమ్ ఏ విధంగా స్పందిస్తాడో చూడాలి. గతంలో కూడా త్రివిక్రమ్ చేసిన సినిమాలు అఆ.., అజ్ఞాతవాసి సినిమాలు కాపీ కథలంటూ విమర్శలు వచ్చాయి, అప్పటికి త్రివిక్రమ్ ఎన్నో విమర్శలకు గురయ్యాడు. మరి ఇప్పుడు ఎలా స్పందిస్తాడో చూడాలి.
