టెక్నాలజీ పెరుగుతున్న కొద్ది అది సమాజానికి ఎంత మంచి చేస్తుందో అదే స్థాయిలో చెడు కూడా చేస్తోంది. ముఖ్యంగా ఎంటర్టైన్మెంట్ రంగం మీద టెక్నాలజీ ప్రభావం తీవ్రంగా ఉంటోంది. ముఖ్యంగా పైరసీ కారణంగా సినీ రంగానికి భారీగా నష్టాలు వస్తున్నాయి. సినిమా రిలీజ్ అయిన గంటల్లోనే పైరసీ కాపీలు వచ్చేస్తుండటంతో థియేటర్లకు వెళ్లి సినిమా చూసే జనం తగ్గిపోతున్నారు. అయితే జనాలు ఇలా పైరసీ సినిమాలు డౌన్లోడ్ చేస్తుండటంతో కొంతమంది సైబర్ నేరగాళ్లు ఈ డౌన్లోడ్ రూపంలో కంప్యూటర్లలోకి వైరస్లు ప్రవేశ పెడుతున్నారు.
ముఖ్యంగా భారీగా ప్రచారంలో ఉన్న సినిమాల డౌన్లోడ్ ద్వారా ఈ దాడులకు పాల్పడుతున్నట్టుగా గుర్తించారు సైబర్ నిపుణులు. ఇటీవల ఆస్కార్ అవార్డులలో సత్తా చాటిన పలు హాలీవుడ్ చిత్రాల ద్వారా ఈ దాడి జరుగుతున్నట్టుగా నెటిజెన్లను హెచ్చరించారు. ప్రముఖ సైబర్ సెక్యూరిటీ సంస్థ కాస్పెర్ స్కీ ఈ దాడికి సంబంధించిన వార్తను వెల్లడించింది. ముఖ్యంగా జోకర్ సినిమా డౌన్లోడ్ల ద్వారా వైరస్ ఎటాక్ జరుగుతున్నట్టుగా గుర్తించినట్టుగా తెలిపింది. ఈ సినిమాలో నటించిన జొవాక్విన్ ఫీనిక్స్ కు ఉత్తమ నటుడిగా ఆస్కార్ అవార్డు కూడా లభించింది. అంతేకాదు ఆస్కార్ కు నామినేట్ అయిన సినిమాలకు సంబంధించిన పైరసీ సైట్లలో ఉన్న లింకులలో వైరెస్ ఉన్న 925 లింకులను కాస్పెర్ స్కీకు చెందిన నిపుణులు కనుగొన్నారు. వీటిలో జోకర్తో పాటు మరికొన్ని సినిమాలు కూడా ఉన్నాయి.
అయితే వీటిలో జోకర్ సినిమాకు సంబంధించిన లింకులే ఎక్కువగా ఉన్నట్టుగా సైకర్ సెక్యూరిటీ నిపుణులు గుర్తించారు. జోకర్ సినిమాకు సంబంధించినవే దాదాపు 304 లింకులు ఉన్నాయి. దీంతో జోకర్ సినిమా పైరసీ డౌన్లోడ్ చేయకపోవటమే బెటర్ అని సూచిస్తున్నారు. ఈ సినిమాతో పాటు 1917, ఐరిష్ మ్యాన్ లాంటి సినిమా లింకుల్లో కూడా పెద్ద సంఖ్యలో మాల్ వేర్ ఉన్నట్టుగా గుర్తించారు. దీంతో ఆ సినిమాలు డౌన్లోడ్ చేయటం కన్నా ఆ సినిమాలు అందిస్తున్న ఆన్లైన్ సంస్థల నుంచి అధికారికంగా చూడటమేకరెక్ట్ అని సూచిస్తున్నారు.