ಬೆಂಗಳೂರು: ಇತ್ತೀಚೆಗೆ ಡಿ ಬಾಸ್ ಖ್ಯಾತಿಯ ಚಾಲೆಂಜಿಂಗ್ ಸ್ಟಾರ್ ದರ್ಶನ್ ಲಾಂಚ್ ಮಾಡಿದ ಮೌನಂ ಚಿತ್ರದ ಟ್ರೈಲರ್ ಗೆ ಈಗ ಭರ್ಜರಿ ರೆಸ್ಪಾನ್ಸ್ ಸಿಗುತ್ತಿದೆ. ಭಾರತೀಯ ಚಿತ್ರರಂಗದಲ್ಲೇ ಅಪರೂಪದ ಕಥೆ ಈ ಸಿನಿಮಾದಲ್ಲಿದೆ ಎಂದು ಹೇಳಲಾಗುತ್ತಿದೆ. ಬಹಳ ವಿಭಿನ್ನ ಪ್ರಯೋಗವನ್ನ ಈ ಚಿತ್ರದಲ್ಲಿ ಮಾಡಿದ್ದಾರೆ. ಹೌದು, ಮೌನಂ ಎಂದು ಟೈಟಲ್ ಕೊಟ್ಟು, ಚಿತ್ರ ಭಾರೀ ಹಿಟ್ ಆಗುವಂತೆ ಚಿತ್ರವನ್ನು ಅದ್ಧೂರಿಯಾಗಿ, ವಿಶೇಷವಾಗಿ ಹೊರತರುವ ಪ್ರಯತ್ನ ಮಾಡಿದ್ದಾರೆ.
ಹೌದು.. ಹಿರಿಯ ನಟ ಅವಿನಾಶ್, ಮಯೂರಿ ಮತ್ತು ಬಾಲಾಜಿ ಶರ್ಮಾ ಅಭಿನಯದ ಸಿನಿಮಾ ಮೌನಂ. ನಿಶಬ್ಧಕ್ಕೂ ಶಬ್ಧವಿದೆ ಅನ್ನೋ ಟ್ಯಾಗ್ ಲೈನ್ ಇರೋ ಮೌನಂ ಚಿತ್ರಕ್ಕೆ ರಾಜ್ ಪಂಡಿತ್ ಆ್ಯಕ್ಷನ್ ಕಟ್ ಹೇಳಿದ್ದಾರೆ. ಭಾರತೀಯ ಚಿತ್ರರಂಗದಲ್ಲೇ ಅಪರೂಪದ ಕಥೆ ಇದು ಅಂತ ಚಿತ್ರತಂಡ ಹೇಳ್ತಿದ್ದು, ಕನ್ ಸ್ಟ್ರಕ್ಷನ್ ಬ್ಯುಸಿನೆಸ್ ಮಾಡ್ಕೊಂಡಿರುವ ಶ್ರೀಹರಿ ಈ ಚಿತ್ರಕ್ಕೆ ಬಂಡವಾಳ ಹೂಡಿದ್ದಾರೆ. ಚಾಲೆಂಜಿಂಗ್ ಸ್ಟಾರ್ ದರ್ಶನ್ ಮೌನಂ ಚಿತ್ರದ ಟ್ರೈಲರ್ ಲಾಂಚ್ ಮಾಡಿದ್ದು ತುಂಬಾ ವಿಶೇಷವಾಗಿದ್ದು ಡಿ ಬಾಸ್ ಅಭಿಮಾನಿಗಳಿಗೂ ಇಷ್ಟವಾಗಿತ್ತು.
ತಂದೆ, ಮಗ ಮತ್ತು ಮಗನ ಪ್ರೇಯಸಿಯ ಸುತ್ತಾ ಸುತ್ತುವ ವಿಭಿನ್ನ ಕಥೆ ಮೌನಂ. ಈ ಚಿತ್ರದಲ್ಲಿ ಅವಿನಾಶ್ ಬಹಳ ವಿಭಿನ್ನ ಶೇಡ್ಗಳಿರೋ ಪಾತ್ರದಲ್ಲಿ ಮಿಂಚಿದ್ದಾರೆ. ನಾಯಕಿ ಮುಯೂರಿ ಕಾಲೇಜು ಸ್ಟುಡೆಂಟ್ ಆಗಿ ಬೋಲ್ಡ್ ಪಾತ್ರದಲ್ಲಿ ಬಣ್ಣ ಹಚ್ಚಿದ್ದಾರೆ. ಕಿರುತೆರೆ ನಟ ಬಾಲಾಜಿ ಶರ್ಮಾ ಹೀರೋ ಆಗಿ ಬಣ್ಣ ಹಚ್ಚಿದ್ದಾರೆ. ಮಗನಿಗೆ ಅಪ್ಪನೇ ಪ್ರಪಂಚ. ಅಪ್ಪನಿಗೆ ಮಗನೇ ಸರ್ವಸ್ವ.
ಹೀಗಿರುವಾಗ ಇಬ್ಬರ ನಡುವೆ ಅಂತ ಬದುಕುತ್ತಿರುವ ಅಪ್ಪ. ಮಗನ ಬಾಳಲ್ಲಿ ಪ್ರೇಯಸಿಯ ಆಗಮನವಾದಾಗ ಏನೆಲ್ಲಾ ಆಗುತ್ತೆ ಎನ್ನೋದನ್ನ ಈ ಚಿತ್ರದಲ್ಲಿ ಹೇಳಲಾಗುತ್ತಿದೆ. ಕಾಮಿಡಿ ಕಿಲಾಡಿ ನಯನಾ, ರಿತೇಶ್, ಸಿಂಚನ ಮತ್ತು ಕೆಂಪೇಗೌಡ ಚಿತ್ರದ ಮುಖ್ಯಭೂಮಿಕೆಯಲ್ಲಿದ್ದು, ಆರವ್ ರಿಶಿಕ್ ಮ್ಯೂಸಿಕ್ ಚಿತ್ರಕ್ಕಿದೆ. ಇದೇ ಫೆ. 21ಕ್ಕೆ ಸೈಕಲಾಜಿಕಲ್ ಎಕ್ಸ್ಪೆರಿಮೆಂಟಲ್ ಸಿನಿಮಾ ಮೌನಂ ರಾಜ್ಯಾದ್ಯಂತ ತೆರೆಗೆ ಅಪ್ಪಳಿಸಲು ಕಾದು ಕುಳಿತಿದೆ. ಪ್ರೇಕ್ಷಕರಿಂದ ಶಿಳ್ಳೆ ಹೊಡಿಸಿಕೊಳ್ಳೋದು ಗ್ಯಾರಂಟಿ ಎಂಬುದು ಚಿತ್ರತಂಡದ ಮಾತಾಗಿದ್ದು ಹೇಗೆ ಮೂಡಿಬರಲಿದೆ ಎಂಬುದು ಕಾದು ನೋಡಬೇಕಾಗಿದೆ.
