కరోనా నేపథ్యంలో దేశ వ్యాప్తంగా లాక్ డౌన్ ప్రకటించిన విషయం తెలిసిందే. ఈ మహమ్మారి కారణంగా సినీ ఇండస్ట్రీకి కూడా కోలుకోలేని దెబ్బ పడింది. కరోనా దెబ్బకు దేశ వ్యాప్తంగా లాక్ డౌన్ ప్రకటించడంతో సినిమా ఇండస్ట్రీ కూడా లాక్ డౌన్‌లోకి వెళ్లింది. సినిమా షూటింగులు ఆగిపోయాయి. అవి ఎప్పుడు తిరిగి ప్రారంభమవుతాయనే దానిపై స్పష్టత లేదు. ఈలోగా వచ్చే ఏడాది జనవరి 8 న విడుదల చేయాలని అనుకున్న రాజమౌలి ఆర్‌ఆర్‌ఆర్‌ను మళ్లీ వాయిదా వేయవచ్చని పుకార్లు ఉన్నాయి.

 

అయితే రాజమౌళి ఈ మధ్య వీడియో కాల్ ద్వారా ఇచ్చిన ఒక ఇంటర్వ్యూలో దాని గురించి స్పష్టం చేశారు. సినిమా షూట్‌లో చాలా భాగం ఇప్పటికే అయిపోయిందని ఆయన స్పష్టంగా పేర్కొన్నారు. కాబట్టి, మిగిలిన భాగాన్ని జూన్ లేదా జూలై నాటికి సులభంగా పూర్తి చేయవచ్చని, పోస్ట్ ప్రొడక్షన్ మరియు ప్రమోషన్లకు ఇంకా తగినంత సమయం ఉంటుందని చెప్పుకొచ్చారు. 'మేము జనవరి 8, 2021 విడుదలకు సరైన ట్రాక్ లోనే ఉన్నాం' అని ఆయన చెప్పారట. ఇది ఇలా ఉండగా ఆర్‌ఆర్‌ఆర్ నుంచి ఇటీవలే విడుదల చేసిన రామ్ చరణ్ క్యారెక్టర్ ఇంట్రడక్షన్ వీడియోకు అద్భుతమైన స్పందన వచ్చింది. సినిమా యొక్క హైప్ మరియు అంచనాలు అకస్మాత్తుగా రెట్టింపు అయ్యాయి.

 

దీనితో ఎన్టీఆర్ పుట్టినరోజు స్పెషల్‌గా మే 20 న విడుదలయ్యే క్యారెక్టర్ వీడియో విడుదల కోసం అందరూ ఆసక్తిగా ఎదురుచూస్తున్నారు. ఆర్ఆర్ఆర్ తరువాతి షెడ్యూల్ లో బాలీవుడ్ భామ ఆలియా భట్ షూటింగ్ లో ఎంటర్ అయ్యే అవకాశం ఉంది. ఆమె ఇప్పటికే షూటింగ్ మొదలు పెట్టాల్సి ఉండగా కరోనా కారణంగా షూటింగ్ వాయిదా పడటంతో అది జరగలేదు. ఈ చిత్రాన్ని డీవీవీ  దానయ్య నిర్మిస్తుండగా కీరవాణి సంగీతాన్ని అందిస్తున్నారు. ఈ చిత్రంలో పలువురు హాలీవుడ్ నటులతో పాటు బాలీవుడ్ స్టార్ హీరో అజయ్ దేవగణ్ కూడా నటిస్తున్న విషయం తెలిసిందే. 

మరింత సమాచారం తెలుసుకోండి: