యంగ్ రెబల్ స్టార్ ప్రభాస్ ప్రస్తుతం రాధాకృష్ణ దర్శకత్వంలో ఓ సినిమా చేస్తోన్న సంగతి తెలిసిందే. ఈ సినిమా తర్వాత ప్రభాస్.. 'మహానటి'తో పాపులర్ అయిన నాగ్ అశ్విన్ డైరెక్షన్‌ లో ఓ సినిమా చేయనున్నాడు. దీనికి సంబంధించిన అధికారిక ప్రకటన కూడా విడుదలైంది. సోసియో ఫాంటసీ బ్యాక్ డ్రాప్ లో తెరకెక్కనున్న ఈ చిత్రాన్ని ప్రముఖ నిర్మాత అశ్వినీదత్ వైజయంతి ప్రొడక్షన్ లో నిర్మించనున్నాడు. ప్రస్తుతం ప్రభాస్ చేస్తున్న చిత్రం పూర్తవగానే ఈ సినిమా మొదలవుతుంది. నాగ్ అశ్విన్ తన గత చిత్రం ‘మహానటి’ని అద్భుతంగా తెరకెక్కించి అందరి మన్ననలు పొందాడు. ప్రభాస్ చిత్రాన్ని కూడా ఆయన అదే స్థాయిలో గొప్పగా తెరకెక్కిస్తారని అభిమానులు ఆశిస్తున్నారు. గత రికార్డులను తిరగరాసేలా ఈ మూవీని అత్యంత ప్రతిష్టాత్మకంగా నిర్మించాలని ప్రయత్నాలు సాగుతున్నాయి. అంతర్జాతీయ స్థాయిలో నిర్మించబడుతున్న ఈ సినిమా అన్ని ప్రధాన భాషల్లో విడుదల కానుంది. అందులో భాగంగా నాగ్ అశ్విన్ ప్రస్తుతం ఈ చిత్రంలోని కీలక పాత్రల కోసం స్టార్ యాక్టర్స్ ను తీసుకోవాలని చూస్తున్నాడట. ఈ సినిమా జోనర్ ఏమిటనేది మేకర్స్ బయటికి చెప్పకున్నప్పటికీ ఇది ఓ సైన్స్ ఫిక్షన్ మూవీ అని సమాచారం.
ఇటీవల నిర్మాత అశ్వినీ దత్ మాట్లాడుతూ.. ఈ సినిమా బడ్జెట్ వందల కోట్లలో ఉంటుంది అన్నారు. ఇక ఈ సినిమాకు భారీ స్టార్ క్యాస్ట్ సైతం భారీగా ఉండనుంది. వివిధ పరిశ్రమలకు చెందిన ప్రముఖ నటులను ఈ సినిమా కోసం తీసుకోనున్నారు. అలాగే వివిధ సాంకేతిక విభాగాలకు సంబంధించి హాలీవుడ్ నిపుణులను తీసుకోనున్నారు. ప్రస్తుత పరిస్థితులలో విదేశాల నుండి టెక్నిషియన్స్ తీసుకురావడం కష్టమైనప్పటికీ ఈ సినిమా స్టార్ట్ అయ్యే లోపు అన్ని సర్దుకుంటాయని చిత్ర బృందం భావిస్తోందట. అంతేకాకుండా ఈ సినిమా కోసం ప్రభాస్ రెండేళ్లు డేట్స్ కేటాయించనున్నాడట. ఇండియాలోనే అత్యంత భారీ బడ్జెట్ తో ఈ సినిమా తెరకెక్కిననున్నారని సమాచారం. ఈ ఏడాది అక్టోబర్ లో అధికారికంగా సెట్స్ పైకి తీసుకెళ్లి.. 2022 సమ్మర్ కానుకగా విడుదల చేయాలన్నది ప్లాన్ చేస్తున్నారట. ఇదే కనుక నిజమైతే రాధాకృష్ణ సినిమా తర్వాత ప్రభాస్ సిల్వర్ స్క్రీన్ మీద కనిపించేది రెండేళ్ల తర్వాతే అని చెప్పవచ్చు.
