'ఇప్పుడు కష్టానికి డెఫినిషన్ మారిపోయింది.. కష్టపడటం అంటే బుర్ర వాడటం' ఇదే కాన్సెప్ట్ ని ఫాలో అయ్యే క్యారెక్టర్ ఏ మన హీరో కృష్ణ(నాగశౌర్య). కోటి రూపాయలు సంపాదించాలని హైదరాబాద్ వచ్చిన కృష్ణ ఒక బ్యాంకు లోన్ రికవరీ ఏజంట్ గా కోటి రూపాయలు వసూలు చేయడానికి రెడీ అవుతాడు. కానీ వాళ్ళందరూ రౌడీలు అవ్వడం వలన అతనికి లోన్ కట్టరు. దాంతో తనే వాళ్ళ రూట్ లోకి వెళ్లి రౌడీలా డబ్బు వసూలు చేస్తాడు. అది చూసిన హైదరాబాద్ రౌడీ శ్రీశైలం(జాకీర్ హుస్సేన్) కృష్ణకి తన దగ్గర దందాలు చేసే పని ఇస్తాడు. అదే టైంలో మన హీరో కృష్ణ హీరోయిన్ పార్వతి(సోనారిక బదోరియా)ని చూసి ప్రేమలో పడడం ఇద్దరూ కనెక్ట్ అవ్వడం జరిగిపోతాయి. ఇదిలా ఉండగా ఎప్పటికప్పుడు తన టీం మెంబర్స్ పేరు మీద హవాలా బిజినెస్ చేసే శ్రీశైలం 2000కోట్ల రూపాయల డీల్ ని తనకు తెలియకుండా తన పేరు మీద స్టార్ట్ చేస్తాడు. అది మొదలైనప్పటి నుంచి కృష్ణ పలు ఇబ్బందుల్లో పడతాడు. తన లవర్ పార్వతి కిడ్నాప్ అవుతుంది. వీళ్ళ గ్రూప్ లో ఉన్న గుంటూరు శీను(అజయ్) రివర్స్ అవుతాడు. చివరికి తన ప్రాణాలు కూడా కోల్పోయే స్టేజ్ కి వచ్చిన కృష్ణ ఈ సమస్యలన్నిటి నుంచి ఎలా బయటపడ్డాడు.? అన్నదే మిగిలిన కథ. 

రొమాంటిక్ ఎంటర్టైనర్స్ అయిన ఊహలు గుసగుసలాడే, దిక్కులు చూడకు రామయ్యా, లక్ష్మీ రావే మా ఇంటికి సినిమాలతో పూర్తి లవర్ బాయ్ ఇమేజ్ ఉన్న నాగ శౌర్య జాదూగాడులో మొదటిసారి ఫుల్ మాస్ పాత్ర చేసాడు. ఓ లవర్ బాయ్ ఇమేజ్ ఉన్న కుర్రాడు ఫుల్ లెంగ్త్ మాస్ పాత్ర చెయ్యాలంటే అతని దానిపై ఎక్కువ అవగాహన ఉండాలి లేదా డైరెక్టర్ కి అన్నా పట్టుండాలి. కానీ ఈ ఇద్దరికీ సరైన అవగాహన లేకపోవడం వలన అనుకున్న స్థాయిలో నాగ శౌర్య పాత్ర ఆన్ స్క్రీన్ పై రాలేదు. నాగ శౌర్య తన వంతు కృషి చేసాడు కానీ పాత్రకి కావాల్సిన మాస్ ని చూపడంలో తనకి ఇంకా అనుభవం మరియు ఫేస్ లో మెచ్యూరిటీ కావాలి. ఆ రెండు లేకపోవడం వలన నాగశౌర్య ఒక 60% మాత్రమే మాస్ పాత్రలో సక్సెస్ కాగలిగాడు. కానీ ఈ రేంజ్ అన్నా చేస్తాడని ఎవరూ ఆశించరు కావున కామన్ ఆడియన్స్ కి బాగానే అనిపిస్తుంది. మొదటిసారైనా ఫైట్లు ఎంతో ఎనర్జీతో బాగా చేసాడు. డాన్సులు కూడా బాగానే చేసాడు. ఇక ఈ సినిమాతో పరిచయం అయిన సొనారిక బదోరియా గురించి చెప్పాలంటే.. ఈ భామ చూడటానికి బొద్దుగా ఉన్నా ముద్దుగానే ఉంది. ముఖ్యంగా తన క్యూట్ లుక్స్ అందరినీ ఆకర్షిస్తాయి. సోనారికలో ఈజ్ అండ్ ఎనర్జీ లెవల్స్ బాగున్నాయి. మొదటి సినిమా, కొత్త భాష అయినా సీన్ కి తగ్గా హావభావాలను బాగా పలికించింది. ఇక పాటల్లో అయితే ఇప్పటి ట్రెండ్ కి కావాల్సిన పొట్టి పొట్టి బట్టల్లో బాగా గ్లామరస్ గా కనిపించి ప్రేక్షకులను మెప్పించింది. కానీ ఇదొక కమర్షియల్ సినిమా కావున తనకి పెద్ద పాత్ర లేదనే చెప్పాలి. విలన్ పాత్రలో అజయ్ మరోసారి ప్రేక్షకులను మెప్పించాడు. ఇక మెయిన్ విలన్ గా చేసిన జాకీర్ హుస్సేన్ ఓ ఏరియాకి పెద్ద గుండా పాత్రలో బాగా సరిపోయాడు. ఆశిష్ విద్యార్థి, రవి కాలే, కోట శ్రీనివాస్ రావుల పెర్ఫార్మన్స్ కూడా పాత్రకి తగ్గట్టు ఉంది. కమెడియన్స్ గా తాగుబోతు రమేష్, శ్రీనివాస్ రెడ్డి, సత్య, పృథ్వీలు చేసింది చిన్న చిన్న పాత్రలే అయినా ఉన్నంత సేపూ బాగా నవ్వించారు. ఇక హడావిడి పాత్రల్లో కనిపించే సప్తగిరి విషయానికి వస్తే ఈ పాత్ర సినిమాకి పెద్ద పాడింగ్. సెకండాఫ్ లో కామెడీ పెట్టాలని ఇరికించిన పాత్ర. పాత్ర ఇంట్రడక్షన్ బాగున్నా రాను రాను డబుల్ మీనింగ్ లోకి వెళ్ళిపోయి ఆడియన్స్ కి చిరాకు తెప్పిస్తుంది. 

ఆపరేషన్ సక్సెస్ పేషంట్ డైడ్' అనే కాన్సెప్ట్ ఈ జాదూగాడు సినిమాకి పర్ఫెక్ట్ గా సరిపోతుంది. అందుకు అంటే రైటర్ మధు సూధన్ - డైరెక్టర్ యోగేష్ కలిసి ఓ మంచి స్క్రిప్ట్ రాయాలని ఆడియన్స్ కి కనెక్ట్ అయ్యే కొత్త మాస్ క్యారెక్టర్ ని సృష్టించారు. ఆ పాత్రకి ఇంట్రడక్షన్, ఫస్ట్ ఎలివేషన్ సీన్స్ వరకూ బాగానే రాసుకున్నారు. ఆ తర్వాత ఏమైందో వీరిద్దరికీ కథ కాశ్మీర్ కి వెళితే, హీరో క్యారెక్టరైజేషన్ కన్యాకుమారికి వెళ్ళింది. దాంతో ఫస్ట్ హాఫ్ కామన్ గా అనిపించినా మాస్ కి కనెక్ట్ అయ్యే కొన్ని ఎపిసోడ్స్ తో మేనేజ్ అయిపొయింది. కానీ సెకండాఫ్ మాత్రం తుస్సుమంది. కనీసం సినిమాలో ఉన్న ఒక్క ట్విస్ట్ అన్నా సరిగా ప్లాంక్ హేసుకొని ఉంటే క్లైమాక్స్ లో ఆడియన్స్ కి కాస్త అబ్బా పర్లేదు బతికించాడు అనే ఫీలింగ్ కలిగేది. కానీ చాలా బోరింగ్ గా రివీల్ చేయడం వలన క్లైమాక్స్ ఇంకా దారుణం అయిపొయింది. ఫైనల్ గా ఓ మంచి క్యారెక్టర్ ని బూడిదలో పోసిన పన్నీరులా ఫ్లాప్ సినిమాలో పెట్టేసారు. ఓవరాల్ గా జాదూగాడు సినిమా నాగ శౌర్య మరియు యోగేష్ లకి కమర్షియల్ గా మాస్ హిట్ ని ఇవ్వలేకపోయింది.