శివాజీ(మంచు విష్ణు) ఒక సాధారణ యువకుడు తన కళ్ళ ముందు ఏదయినా తప్పు జరిగితే నిలదీసి అడిగే వ్యక్తిత్వం కలవాడు. ఇతనికి అనామిక(ప్రణీత) పరిచయం అవుతుంది, ఇద్దరు ఒక రెస్టారెంట్లో డేట్ కి కలవాలి అని నిర్ణయించుకుంటారు. వీరి మధ్య బంధం పెరిగి బలపడుతున్న సమయంలో అనామిక శివాజీ చూస్తుండగానే కిడ్నాప్ కి గురవుతుంది, ఆమెను కాపాడాలి అన్న శివాజీ ప్రయత్నం విఫలం అవుతుంది. పోలీస్ కి కంప్లైంట్ చేసిన శివాజీ కి అనుకోని సంఘటనలు ఎదురవుతుంది. అసలు అనామిక కిడ్నాప్ కాలేదు అన్నట్టు అతను చెప్తున్నవి అన్ని అబద్దాలని పోలీస్ లను పరిస్థితులు నమ్మిస్తుంది. కాని ఇవేవి నమ్మశక్యంగా లేదని దీని వెనుక ఏదో జరుగుతుందని ఎలాగయినా అనామికను కాపాడాలని నిశ్చయించుకుంటాడు శివాజీ. ఇక్కడ మొదలయిన అతని పరుగు ఎటువైపు తీసింది ? అసలు అనామికను ఎవరు కిడ్నాప్ చేసారు? ఎందుకు కిడ్నాప్ చేసారు? వీటన్నింటికి రిషి దేవ్ (జేడి చక్రవర్తి) కి ఉన్న సంభంధం ఏంటి అనేది తెర మీద చూసి తెలుసుకోవాల్సిందే..
మంచు విష్ణు ఈ చిత్రం కోసం చాలా కష్టపడ్డారు , స్టంట్స్ విషయంలో కాని శరీర ఆకృతి విషయంలో కాని చాలా జాగ్రత్త తీసుకున్నారు. స్టైలింగ్ కూడా చాలా విభిన్నంగా ప్రయత్నించారు, గెడ్డం మరియు టాటూ అన్ని కొత్తగానే ఉన్నాయి కాని పాత్రకి సూట్ అవ్వలేదు ఒక సాధారణ యువకుడు ఒక అసాధారణ శక్తితో పోరాడటం ఈ చిత్ర సారాంశం, చిత్రం ఆసాంతం విష్ణు ఒక హీరో లా కనిపించాడు కాని సాధారణ యువకుడిలా ఎక్కడా కనిపించలేదు. ప్రణీత నిజానికి ఈ చిత్రంలో కీలక పాత్ర, నటనకు బోలెడంత ఆస్కారం ఉన్న పాత్ర కాని ఈ నటిని అందాలను చూపించడానికి ఉపయోగించినంతగా మరే విషయానికి ఉపయోగించుకోలేదు. అందాల ఆరబోతలో ప్రణీత నూటికి నూట యాభై మార్కులు సంపాదించుకుంది కాని నటన విషయం లో పాస్ మార్కులు కూడా కష్టమే.. ఏదయితేనే ఆమె అందంతో ఆకట్టుకోవాలన్న దర్శకుడి యొచనకి న్యాయం చేసింది. జేడి చక్రవర్తి పాత్ర గురించి చెప్పాలంటే ఒక సమస్య ఉంది నిజానికి "డైనమైట్" అనే చిత్రంలో జేడి చక్రవర్తి నటించింది కేవలం పది నిమిషాలు మాత్రమే పూర్తిగా రెండు గంటలు కూడా షూటింగ్ లో పాల్గొనే అవసరం లేదంటే ఊహించుకోండి , సమస్య ఏంటంటే ఈ చిత్రం "అరిమ నంబి" రీమేక్ అని తెలిసిందే కాని జేడి చక్రవర్తి పాత్ర మాత్రం డబ్బింగ్ అని చెప్పుకోవాలి. అక్కడ సన్నివేశాలను కట్ చేసి ఈ చిత్రంలో పేస్ట్ చేసి డబ్ చేయించారు. కాబట్టి నిజానికి ఈయన పాత్ర గురించి చెప్పాలంటే "అరిమ నంబి" అనే చిత్రంలో ఈయన నటన గురించి చెప్పాలి. ఇది పక్కన పెడితే ఒక తెలివయిన ప్రతినాయకుడికి ఉండవలసిన బాడీ లాంగ్వేజ్ మరియు స్క్రీన్ ప్రెజెన్స్ ని అద్భుతంగా కనబరిచారు. డైనమైట్ లో ఈయన నటన గురించి చెప్పడానికి ఎం లేదు ఎందుకంటే చివరి పది నిమిషాలు మాత్రమే ఈయన ఈ చిత్రం కోసం ప్రత్యేకంగా నటించారు. నాగినీడు, ప్రవీణ్ , పరుచూరి వెంకటేశ్వర రావు , రాజరవింద్ర ఉన్న కాసేపు ఆకట్టుకున్నారు. ఇక కట్ పేస్ట్ పాత్రలు పోషించిన యొగ్ జపీ మరియు లేఖ వాషింగ్టన్ మాతృక లో ఆకట్టుకున్నారు. వారి పాత్రలను డబ్ చేసారు కాబట్టి ఈ చిత్రం కోసం నటించినట్టు పరిగణించడం సమంజసం కాదు..కాని ఇరువురు వారి పాత్రలకు తగ్గ న్యాయం చేసారు.
ఒక చిత్రాన్ని రీమేక్ చెయ్యడం అంటే ఆ చిత్రంలో ఏదయినా లోపాలు ఉంటె సరిచేసుకొని తెరకెక్కించడం. నిజానికి "అరిమ నంబి" అంత గొప్ప చిత్రం కాదు తమిళంలో కూడా యావరేజ్ గా నడిచింది. మరి అటువంటి చిత్రాన్ని తీసుకొని ఎక్కడ లోపం ఉందో చూసుకొని తెరకేక్కించవలసిన చిత్రాన్ని మరిన్ని లోపాలతో తెరకెక్కిస్తే "డైనమైట్" చిత్రంలా కనిపిస్తుంది. కష్టపడటం కాదు కష్టాన్ని ఎందులో పెడుతున్నామో ఒకసారి గమనించుకోవలసిన అవసరం మంచు సహోదరులకి కచ్చితంగా ఉంది ఎందుకంటే వీరి చిత్రాలలో వీరి కష్టం లోపించడం ఎప్పుడు గమనించలేదు కాని సమస్య కథనం తోనే వస్తుంది. తమిళ్ వచ్చినవాళ్ళు మాతృకను ఒకసారి చూడవచ్చు. తమిళం అర్ధం కానివాళ్ళు ఓపిగ్గా ఒక్కసారి ప్రయత్నించదగ్గ చిత్రం "డైనమైట్"..