రాజా (అల్లరి నరేష్) ఓ మ్యారేజ్ బ్యూరో నడిపిస్తుంటాడు. అతనికున్న వీక్ నెస్ ఎప్పుడు పడితే అప్పుడు సెల్ఫీలు దిగడమే. ఉదయం లేవడమే సెల్ఫీతో డే స్టార్ట్ చేస్తుంటాడు. అయితే తను తీసే సెల్ఫీలతో అవతలవారిని అడ్డంగా బుక్ చేస్తూ వారందరు తన మీద గొడవకు వచ్చేలా చేసుకుంటాడు. అదొక్కటే కాదు నోటికి దూల ఎక్కువ. ఇక అలాంటి సెల్ఫీ రాజా శ్వేతను (కామ్న రనౌత్)ను మొదటి చూపులోనే ఇష్టపడి ఆమెకు ప్రపోజ్ చేస్తాడు. శ్వేత కూడా రాజా లవ్లో పడుతుంది. శ్వేత ఫాదర్ పోలీస్ కమీషనర్ (నాగినీడు) పెళ్లికి ఒప్పుకోవడం పెళ్లి జరిగిపోవడం అంతా జరుగుతుంది. పెళ్లి తర్వాత ఓ చిన్న గొడవతో రాజా శ్వేతలు విడిపోతారు. ఇక జీవితం బరువెక్కడంతో చనిపోవాలనుకున్న రాజా కిల్లర్ ఖాకి (రవిబాబు)కు తనను చంపే కాంట్రాక్ట్ ఇస్తాడు. ఇక్కడే షాక్ తనను చంపేందుకు ముంబై నుండి వచ్చిన భీమ్స్ కూడా అచ్చం రాజాలానే ఉంటాడు. ఇతంకీ రాజాను భీమ్స్ ఏం చేశాడు..? రాజాను చంపేందుకు భీమ్స్ మనుషులే కాకుండా మరో బ్యాచ్ ఎందుకు ప్రయత్నం చేస్తుంది..? రాజా శ్వేతలు కలిశారా లేదా..? అన్నది అసలు కథ.
సెల్ఫీ రాజా, భీమ్స్ క్యారక్టర్స్ లో అల్లరి నరేష్ మరోసారి ద్విపాత్రాభినయం చేశాడు. ఇదవరకు డ్యుయల్ రోల్ చేసినా ఈ సినిమాలో నరేష్ కాస్త కొత్తగా కనిపించాడు. అంతేకాదు లుక్ విషయంలో కూడా అల్లరి నరేష్ ఇందులో సూపర్ అనిపించాడు. కాని రొటీన్ కామెడీనే అయ్యేసరికి ప్రేక్షకులను అంతగా మెప్పించలేదు. ఇక హీరోయిన్ గా చేసిన కామ్న రనౌత్ ఓకే అనిపించుకుంది. సినిమాలో ఆమెకు అంత ఎక్కువ స్కోప్ లేదు. ఇకపోతే సెకండ్ హీరోయిన్ గా సాక్షి చౌదరి నటించింది. సాక్షి అందాలు అక్కడక్కడ సినిమాకు ప్లస్ అయ్యాయి. అంతేతప్ప తను కూడా అంత ఇంప్రెస్ చేయలేదు. ఇక నాగినీడు క్యారక్టర్ కమీషనర్ గా ఓకే అనిపించేలా ఉన్నా ఓ కమీషనర్ అంత సుతిమెత్తగా ఉంటాడా అన్న డౌట్ వస్తుంది. ఇక కమెడియన్స్ కృష్ణ భగవాన్, సప్తగిరి, తాగుబోతు రమేష్ చేసిన కామెడీ ఓ ఎత్తైతే జబర్దస్థ్ టీం మొత్తం ఇందులో రకరకాల పాత్రల్లో అలరించడం విశేషం. ముఖ్యంగా అంకుశం పోలీస్ గా ప్రుధ్వి మరోసారి ఇరగదీశాడు.
ఈశ్వర్ రెడ్డి అనుకున్న సెల్ఫ్రీ రాజా పాయింట్ ఓకే అనిపించేలా ఉన్నా ఇదే సబ్జెక్ట్ తో ఇదవరకే సినిమాలు చూశామన్న ఫీలింగ్ కలుగుతుంది. ఇక దర్శకుడిగా కథనం ఏమన్నా గ్రిప్పింగ్ తో నడిపించాడా అంటే కొన్ని చోట్ల కామెడీ వర్క్ అవుట్ అయినా మరికొన్ని చోట్ల మాత్రం కాస్త ల్యాగ్ అయినట్టు అనిపిస్తుంది. ఇక సినిమాకు సాయి కార్తిక్ అందించిన పాటలు బాగున్నాయి. నరేష్ సినిమా రేంజ్ కు ఈ పాటలు ఇవ్వడం మంచి విషయం. పాటలను పిక్చరైజ్ చేసిన విధానం కూడా బాగుంది. కెమెరామన్ పనితనం బాగుంది. ఎడిటర్ ఎం.ఆర్ వర్మ సినిమా ఇంకాస్త ట్రిం చేసుంటే బాగుండేది.. అక్కడక్కడ జర్క్ లు వచ్చినట్టు అనిపిస్తుంది. ఇక సినిమా నిర్మాణ విలువల విషయానికొస్తే కథకు తగ్గట్టు ఎంత అవసరమో అంత ఖర్చు పెట్టడంలో ఏమాత్రం వెనుకాడలేదు. రిచ్ ప్రొడక్షన్ వాల్యూస్ తో సినిమా కూడా రిచ్ గానే అనిపించింది.
