పెళ్లైన ఐదు సంవత్సరాలకు లేక లేక పుట్టిందని రాఘవరావు (రావు రమేష్) కూతురు పద్మావతి (హెబ్భా పటేల్) ను అల్లారు ముద్దుగా పెంచుతాడు. ఆమె పుట్టిన వేళా విశేషం మంచిది కాదని ఆమె తనకి దూరం అవుతుందని కూతురికి తనకు అసలు పడదని అయ్యగారు చెబుతాడు. అయితే అప్పటి నుండి కూతురు ఏం చెప్పినా సరే అడ్డుచెప్పకుండా ఆమెకు నచ్చినట్టు ఉంటాడు రాఘవరావు. ఇంజినీరింగ్ ఫెయిల్ అయినా ఆమె కోసం జాబ్ సెట్ చేస్తాడు. పెళ్లి కోసం అమ్మ నాన్నల ఇబ్బందిని తప్పించుకునేందుకు ప్రేమిస్తున్నానని అబద్ధం చెబుతుంది పద్దు. ఇక లవర్ ను వెతికే వేటలో నాని (అశ్విన్), గోకుల్ (నోయెల్), నమో (పార్వతీశం) ముగ్గురిని సెలెక్ట్ చేసుకుని ముగ్గురిలో ఒకరిని ఫైనల్ చేసుకునే క్రమంలో ముగ్గురు చెప్పిన లవ్ ప్రపోజల్స్ ను ఓకే అంటుంది. పద్మావతి ఆ ముగ్గురిలో చివరకు ఎవరిని పెళ్లి చేసుకుంటుంది..? రాఘవరావుకి పద్దు ప్రేమ మ్యాటర్ తెలిసిందా..? అన్నది అసలు కథ.
టైటిల్ లోనే నాన్నగా చేసిన రావు రమేష్ పాత్ర చాలా గొప్పగా ఉంటుందని చెప్పేశారు. అలానే తన మార్క్ నటంతో నాన్నగా అదరగొట్టాడు రావు రమేష్. కూతురిని అమితంగా ప్రేమించే తండ్రిగా రావు రమేష్ నటనకు హ్యాట్సాఫ్ చెప్పాల్సిందే. ఇక ఆమె ప్రేమించిన ప్రియుళుగా నటించిన అశ్విన్, నియోల్, పార్వతీశం కూడా బాగానే చేశారు. సీరియస్ మోడ్ నుండి కామెడీ లోకి వచ్చే ప్రయత్నంలో అశ్విన్ చేసిన ఈ సినిమా బాగా హెల్ప్ అవుతుంది. ఇక పార్వతీశం పంతులు గెటప్ థియేటర్లో నవ్వులు పండిస్తుంది. బాస్కెట్ బాల్ ప్లేయర్ గా నోయెల్ కూడా లీడ్ రోల్ లో మంచి నటన కనబరిచాడు. ఇక సినిమా అంతా తన మీద వేసుకుని చేసింది హెబ్భా పటేల్. ఓ కన్ ఫ్యూజ్డ్ క్యారక్టర్ లో ఆమె చూపించిన అభినయం బాగుంది. సినిమా మొత్తం తన భుజాన వేసుకుని అందానికి అందం.. అభినయానికి అభినయం అన్నట్టుగా హెబ్భా తన విశ్వరూపాన్ని చూపించింది.ఇక తేజశ్వి మడివాడా కూడా హెబ్భా ఫ్రెండ్ గా అదరగొట్టింది. ముఖ్యంగా ఆమె చేసిన కామెడీ బాగుంది. ఇక మిగతా పాత్రలన్ని పరిధి మేరకు నటించాయి.
సినిమా టెక్నికల్ టీం విషయానికొస్తే ముందుగా దర్శకుడు బండి భాస్కర్ గురించి మాట్లాడాలి. సినిమా కథ కథనాలన్ని పర్ఫెక్ట్ గా రావడంలో దర్శకుడి ప్రతిభ మెచ్చుకోదగినదే అయితే ఇలాంటి సినిమాలు ఇదవరకు చూశాం అన్నట్టుగా స్క్రీన్ ప్లే ఉంటుంది. దర్శకుడు అన్ని విధాలుగా సక్సెస్ అయినట్టే అనిపించినా సినిమాలో కథ అనేది మాములుగా ఉంటుంది. ఇక సినిమాకు పనిచేసిన కెమెరామన్ చోటా కె నాయుడు తన పనితనంతో సినిమాను మరో స్టేజ్ కు తీసుకెళ్లారు. మ్యూజిక్ డైరక్టర్ శేఖర్ చంద్ర కంపోజ్ చేసిన అన్ని పాటలు బాగున్నాయి.. బ్యాక్ గ్రౌండ్ స్కోర్ కూడా బాగుంది. ఎడిటింగ్ అక్కడక్కడ కాస్త ల్యాగ్ అయినట్టు అనిపిస్తుంది అది ట్రిం చేసి ఉంటే బాగుండేది. బెక్కం వేణు గోపాల్ ప్రొడక్షన్ వాల్యూస్ బాగున్నాయి.
