భ్రమరాంబ (రకుల్ ప్రీత్ సింగ్) ఓ సరదా అమ్మాయి. పల్లెటూరిలో పెరిగిన రకుల్ మనసులో ఎలాంటి ఫీలింగ్ ఉన్నా ఇట్టే బయట పెట్టేస్తుంది. తండ్రి సంపత్ అంటే చాలా ఇష్టమున్న భ్రమరాంబ తండ్రి మాట జవ దాటదు. సిటీకి వెళ్లాల్సి వచ్చిన భ్రమరాంబకు అమ్మ ఆంక్షలు పెడుతుంది. భ్రమరాంబను చూడగానే ప్రేమలో పడతాడు శివ (నాగ చైతన్య). తనతో ప్రేమ అంటూ వెంటపడొద్దని శివను హెచ్చరిస్తుంది భ్రమరాంబ. శివ, భ్రమరాంబ ఒకరినొకరు ఇష్టపడుతున్నా తండ్రి మీద ప్రేమతో అతనికి గుడ్ బై చెప్పి వెళ్తుంది. శివ తండ్రికి భ్రమరాంబ తండ్రికి కూడా సంబంధం ఉంటుంది. ఇంతకీ శివ భ్రమరాంబ కలిశారా..? భ్రమరాంబ కోసం శివ ఏం చేశాడు అన్నది అసలు కథ.
రారండోయ్ వేడుక చూద్దాం సినిమాలో శివ రోల్ లో ఆకట్టుకున్నాడు నాగ చైతన్య. లవర్ బోయ్ ఇమేజ్ తో నాగ చైతన్య తన మార్క్ నటనతో ఆకట్టుకున్నాడు. స్క్రీన్ పై చైతు, రకుల్ ల జంట చూడముచ్చటగా ఉంటుంది. ఇక భ్రమరాంబగా రకుల్ అదరగొట్టేసింది. అల్లరి పిల్లగా రకుల్ మరోసారి తన టాలెంట్ చూపించేసింది. జగపతి బాబు తన హుందాతనంతో ఆకట్టుకోగా సంపత్ రాజు కూడా ఇచ్చిన రోల్ కు న్యాయం చేశాడు. వెన్నెల కిశోర్ కామెడీ బాగుంది. ఇక మిగతా పాత్రలన్ని పరిధి మేరకు నటించారు.
రారండోయ్ వేడుక చూద్దాం సినిమా దర్శకుడు కళ్యాణ్ కృష్ణ ఓ రొటీన్ కథతోనే వచ్చాడు. అయితే సినిమా మొత్తం కలర్ ఫుల్ గా చూపించడంలో సక్సెస్ అయ్యాడు. కథ పాతదే అయినా కథనంలో కాస్త తన టాలెంట్ చూపించేశాడు. దేవి మ్యూజిక్ బాగుంది. సినిమాకు అదే ప్లస్ పాయింట్ అని చెప్పొచ్చు. ఇక కెమెరా మన్ పనితనం కూడా పర్వాలేదు. అన్నపూర్ణ స్టూడియోస్ ప్రొడక్షన్ వాల్యూస్ బాగున్నాయి.
