మెగాస్టార్ చిరంజీవి తనయుడు రాంచరణ్ హీరోగా ఎంట్రీ ఇచ్చిన మొదటి సినిమా ‘చిరుత’. హీరోగా మంచి పేరు వచ్చినా..కమర్షియల్ గా పెద్దగా హిట్ కాలేకపోయింది. ఆ తర్వాత రాజమౌళి దర్శకత్వంలో వచ్చిన ‘మగధీర’ మంచి విజయం సాధించింది. ఈ సినిమాతో రాంచరణ్ కి మంచి పేరు రావడమే కాదు అప్పటి ఉమ్మడి ఆంధ్రప్రదేశ్ లో రికార్డుల మోత మోగించింది. అప్పటి నుంచి రాంచరణ్ నటించిన సినిమాలు అన్ని మంచి విజయాలు సాధించినా..మూడు సంవత్సరాల క్రితం కాస్త బ్రేక్ పడింది.
ఆ మద్య సురేందర్ రెడ్డి దర్శకత్వంలో వచ్చిన ‘ధృవ’ మరో ఘనవిజయం సాధించింది. ఆ తర్వాత సుకుమార్ దర్శకత్వంలో ‘రంగస్థలం’ చిత్రంలో నటించారు చరణ్. ఈ సినిమా దాదాపు సంవత్సరం కాలం పాటు షూటింగ్ జరుపుకుంది..ఎన్నో అవాంతరాలు దాటి వచ్చిన ‘రంగస్థలం’ రిలీజ్ అయిన అన్ని థియేటర్లలో కలెక్షన్ల సునామీ సృష్టించింది. ఈ మధ్య కాలంలో టాక్ పరంగాను .. వసూళ్ల పరంగాను ఒక రేంజ్ లో స్పీడ్ చూపించిన మూవీ ఏది అంటే 'రంగస్థలం' అని ఎవరైనా చెప్పేస్తారు.
అంతలా ఈ సినిమా ప్రేక్షకుల మనసులను కట్టి పడేసింది .. ఒకటికి రెండుసార్లు వాళ్లు థియేటర్లకు వచ్చేలా చేసింది. 1985 కాలం నాటి పరిస్థితులు..ప్రేమ, రాజకీయం..అన్ని ఎమోషన్స్ దర్శకులు సుకుమార్ ఈ సినిమాలో చూపించి ప్రేక్షకులకు కొత్తదనాన్ని అందించారు. రంగస్థలం కలెక్షన్ల విషయానికి వస్తే.. 80 కోట్ల ప్రీ రిలీజ్ బిజినెస్ జరుపుకున్న ఈ సినిమా, 120 కోట్ల షేర్ ను రాబట్టింది.
నైజామ్ ఏరియాలో 18 కోట్లకు అమ్ముడు కాగా, 34 రోజుల్లో 27 కోట్లను వసూలు చేసింది. సీడెడ్లో 12 కోట్లకు అమ్ముడుపోగా అంతే సమయంలో 17 కోట్లను రాబట్టింది. ఉత్తరాంధ్రలో 8 కోట్లకి పోయిన ఈ సినిమా,12.08 కోట్ల షేర్ ను తెచ్చిపెట్టింది. ఓవర్సీస్ రైట్స్ 9 కోట్లకి పోగా 16.5 కోట్ల షేర్ వచ్చింది. ఇలా ఈ సినిమా భారీ లాభాలను సొంతం చేసుకుంటూ చరణ్ కెరియర్లోనే ది బెస్ట్ గా నిలిచింది.
