సినిమా ఇండస్ట్రీలో అతి తక్కువ సమయంలో ఎక్కువ పాపులారిటీ తెచ్చుకున్న వారు వేళ్ల మీద లెక్కపెట్టవొచ్చు. ఇండస్ట్రీలో సంవత్సరాల కొద్ది నటించినా..స్టార్ ఇమేజ్ తో వారసులుగా ఎంట్రీ ఇచ్చినా..సక్సెస్ కాలేక ఇండస్ట్రీకి దూరమైన వారు ఎంతో మంది ఉన్నారు. కానీ కొంత మందికి మాత్రం ఒకటీ రెండు సినిమాలతోనే స్టార్ హోదా రావడం విశేషం..అలాంటి వారిలో సాయి పల్లవి, కీర్తి సురేష్, విజయ్ దేవరకొండ లాంటి వారు ప్రస్తుతం మంచి ఫామ్ లో ఉన్నారు. పెళ్లిచూపులు సినిమాతో హీరోగా మంచి గుర్తింపు తెచ్చుకున్న విజయ్ దేవరకొండ తర్వాత సందీప్ వంగ దర్శకత్వంలో ‘అర్జున్ రెడ్డి’సినిమాతో కమర్షియల్ హీరోగా మారిపోయాడు.
ప్రస్తుతం విజయ్ దేవరకొండ హీరోగా 'టాక్సీ వాలా' సినిమా రూపొందింది. ఈ సినిమా ద్వారా రాహుల్ సాంకృత్యాన్ దర్శకుడిగా పరిచయమవుతున్నాడు. ఇప్పటికే ఈ సినిమా ప్రేక్షకుల ముందుకు రావలసింది. కానీ కొన్ని కారణాల వలన ఆలస్యమవుతూ వచ్చింది. ప్రస్తుతం పోస్ట్ ప్రొడక్షన్ పనులను జరుపుకుంటోంది.జూన్ రెండో వారంలో చిత్రాన్ని ప్రేక్షకుల ముందుకు తీసుకురావడానికి నిర్మాతలు సన్నాహాలు చేస్తున్నారు. ఇప్పటికే ఈ చిత్రం ఫస్ట్‌లుక్, టీజర్‌కు మంచి స్పందన వచ్చింది. ‘అర్జున్ రెడ్డి’ తరవాత విజయ్ మళ్లీ కమర్షియల్ హిట్ అందుకోలేదు. ఈ చిత్రంతో విజయ్ దేవరకొండ కమర్షియల్ హీరోగా ఓ మెట్టు పైకెక్కుతాడని చిత్ర యూనిట్ చెబుతోంది.
జీఏ2 పిక్చర్స్, యు.వి.క్రియేష‌న్స్‌ సంయుక్తంగా ఈ చిత్రాన్ని నిర్మిస్తున్నాయి. ఎస్కేఎన్ నిర్మాత. ప్రియాంక జవాల్కర్, మాళవికా నాయర్, కళ్యాణి, మధునందన్, సిజ్జు మీనన్, రవి ప్రకాష్, రవి వర్మ, ఉత్తేజ్, విష్ణు తదితరులు నటించారు. కాగా, చిత్ర విశేషాల గురించి తెలియజేస్తూ నిర్మాత ఎస్కేఎన్ ఒక ప్రకటనను విడుదల చేశారు. ‘విజయ్ దేవరకొండకు ఉన్న క్రేజ్, పాపులారిటీ దృష్టిలో పెట్టుకుని ఈ చిత్రాన్ని నిర్మించాం. విజయ్ ఇమేజ్‌కి తగ్గట్టుగానే అన్ని వర్గాల ప్రేక్షకులకు వినోధాన్ని పంచే విధంగా ‘టాక్సీవాలా’లో ఆయన పాత్రను దర్శకుడు రాహుల్ తీర్చిదిద్దారు.
డైరెక్టర్ రాహుల్ టేకింగ్, సుజిత్ విజువల్స్, జేక్స్ మ్యూజిక్, కృష్ణకాంత్ లిరిక్స్, జాషువా స్టంట్స్ ఈ చిత్రంలో హైలైట్‌గా నిలుస్తాయి. మంచి కథ, నటీనటుల పనితనాన్ని దృష్టిలో ఉంచుకొని ఈ చిత్రాన్ని గొప్పగా నిర్మించాం. ప్రస్తుతం పోస్ట్ ప్రొడక్షన్ పనులు జరుగుతున్నాయి. జూన్ రెండో వారంలో ఈ చిత్రాన్ని ప్రపంచవ్యాప్తంగా బ్రహ్మాండంగా విడుదల చేసేందుకు సన్నాహాలు చేస్తున్నాం’ అని ప్రకటనలో పేర్కొన్నారు.
