భారత్‌లో క్రికెటర్లతో బాలీవుడ్ తారల ప్రేమాయణం కొత్తేం కాదు. మన్సూర్ అలీఖాన్ పటౌడీ - షర్మిలా ఠాగూర్ నుంచి విరాట్ కోహ్లీ - అనుష్క శర్మ వరకు అనేక జంటలు పెళ్లి బంధంతో ఒక్కటయ్యాయి. గత ఆదివారంతో ముగిసిన ఐపీఎల్ 2018 సీజన్‌లో కేఎల్ రాహుల్ తన బ్యాట్‌తో అభిమానులను అలరించాడు. ఈ సీజన్‌లో కింగ్స్ ఎలెవన్ పంజాబ్ జట్టుకు ప్రాతినిథ్యం వహించిన కేఎల్ రాహుల్ ఐపీఎల్‌లో అత్యంత వేగంగా హాఫ్ సెంచరీని నమోదు చేసిన సంగతి తెలిసిందే.
క్రికెటర్ కేఎల్ రాహుల్‌తో బాలీవుడ్ తార నిధి అగర్వాల్ చెట్టాపట్టాలేసుకొని తిరుగుతోంది. రాహుల్‌తో ఈమె డేటింగ్‌లో ఉన్నట్లు వార్తలు వినిపిస్తున్నాయి. ఇక బాలీవుడ్‌కు సుపరిచితమైన నిధి అగర్వాల్ ప్రస్తుతం తెలుగులో నాగచైతన్యతో కలిసి ఓ సినిమా చేస్తోంది. చందు మొండేటి దర్శకత్వంలో చైతూ హీరోగా తెరకెక్కుతోన్న ‘సవ్యసాచి’ సినిమాలో నిధి కథానాయికగా చేస్తోంది.
బాలీవుడ్‌లో హాట్ తారగా అమ్మడికి ఇప్పటికే గుర్తింపు వచ్చింది. కొద్ది రోజుల కిందట రాహుల్, నిధి కలిసి ముంబైలో ఓ రెస్టారెంట్‌కు వెళ్లినట్లు సమాచారం. ముంబైలోని బాంద్రా ప్రాంతంలో వీరిద్దరూ జంటగా కనిపించారు. ఈ ఫొటోలు ఇప్పుడు నెట్టింట్లో హల్‌చల్ చేస్తున్నాయి. తాజాగా క్రికెట్ స్టార్ కేఎల్ రాహుల్ తో తాను డేటింగ్ లో ఉన్నానంటూ వచ్చిన వార్తలపై హీరోయిన్ నిధి అగర్వాల్ స్పందించింది.
వీరిద్దరూ కలిసున్న ఫొటోలు సోషల్ మీడియాలో గత కొన్ని రోజులుగా చక్కర్లు కొడుతుండగా, తనకు కేఎల్ రాహుల్ చాలా కాలం నుంచి తెలుసునని, అతనితో కలసి డిన్నర్ కు మాత్రమే వెళ్లానని, తామిద్దరం డేటింగ్ లో ఉన్నామని వచ్చిన వార్తలు పుకార్లేనని తేల్చేసింది. క్రికెటర్ గా తాను, సినీ నటిగా నేను కాకముందే తామిద్దరమూ బెంగళూరులో కలసి చదువుకున్నామని వెల్లడించింది. తమ మధ్య స్నేహం తప్ప మరేదీ లేదని నిధి అగర్వాల్ వెల్లడించగా, ఈ విషయంలో రాహుల్ ఇంకా స్పందించలేదు.
