భారత దేశ టెలివీజన్ రంగంలో బిగ్ బాస్ కి మంచి ఆదరణ పెరిగింది. హిందీ, తెలుగు, తమిళ, కన్నడ భాషల్లో బిగ్ బాస్ రియాల్టీ షో కి మంచి ఆదరణ లభించింది. ప్రస్తుతం తెలుగు లో బిగ్ బాస్ 2 సీజన్ మొదలైంది. బిగ్ బాస్ సీజన్ 1 కి యంగ్ టైగర్ ఎన్టీఆర్ వ్యాఖ్యాతగా ఉన్నారు. ఇప్పుడు ఎన్టీఆర్ ప్లేస్ లో బిగ్ బాస్ 2 కి నేచురల్ స్టార్ నాని వ్యాఖ్యాతగా వ్యవహరిస్తున్నారు. అయితే బిగ్ బాస్2 ప్రోమోలో ‘ఇంకొంచెం మసాలా’అంటూ ఊదరగొట్టారు. కానీ బిగ్ బాస్ 2 లో మాత్రం ఆ మసాలా ఎక్కడా కనిపించడం లేదని పలువురు విమర్శిస్తున్నారు.
అంతే కాదు బిగ్ బాస్ కంటెస్టంట్ల వ్యవహారం..వారి తీరు చూస్తుంటే నాని కి కూడా అసంతృప్తి కలుగుతుందట. తాజాగా బిగ్ బాస్-2 రియాల్టీ షో గురించి 'ఇంకొంచెం మసాలా' అని చెప్పారని... మసాలా ఉందేమో కానీ, ఫ్లేవర్ మాత్రం మిస్ అయిందని కత్తి కార్తీక సంచలన వ్యాఖ్యలు చేసింది. బిగ్ బాస్-1లో కంటెస్టెంట్ అయిన కార్తీక తన తెలంగాణ యాసలో వీ6 ఛానల్ యాంకర్ గా జనాలను అలరించిన సంగతి తెలిసిందే.
తెలంగాణకు చెందిన ఒక్క కంటెస్టెంట్ ను అయినా పెట్టి ఉంటే బాగుండేదని చెప్పింది. సీజన్-1లో ముగ్గురు తెలంగాణ వాళ్లను పెట్టారని... ఈ సీజన్ లో కూడా అది కొనసాగి ఉంటే బాగుండేదని తెలిపింది. ఈ విషయంలో తాను కొంచెం నిరాశకు గురయ్యానని చెప్పింది. ఒకప్పుడు తాను యాంకర్ గా ఉన్న సమయంలో కేవలం తెలంగాణ ప్రజలకు మాత్రమే తెలుసునని..కానీ బిగ్ బాస్ పుణ్యమా అని ఇరు రాష్ట్ర ప్రజలు తనను బాగా గుర్తించారని చెప్పింది.
