షకలక శంకర్ అందరికీ గుర్తే ఉండి ఉంటుంది. మొదట్లో జబర్దస్త్ షో లో బాగా పాపులారిటీ ని సంపాదించి తరువాత సినిమా లలో కమెడియన్ గా మంచి పేరు సంపాదించుకున్నాడు. అయితే ఇప్పుడు ఈ శంకర్ హీరో గా ఆరంగేట్రం చేస్తున్న సంగతి తెలిసిందే. అయితే ఈ సినిమా కు ముందు త్రివిక్రమ్ తో సినిమా చేయాలని షకలక శంకర్ ప్రయత్నించాడు. అయితే అందుకు త్రివిక్రమ్ రెండేళ్లు ఆగమని చెప్పడంటా...! ఆ క్ర‌మంలోనే నెల్లూరు ర‌మ‌ణారెడ్డి త‌న‌ను హీరోని చేస్తూ శంభో శంక‌ర సినిమా చేశార‌ని, ఆయ‌న దేవుడ‌ని పొగిడేశాడు శంకర్.
త్వ‌ర‌లో రిలీజ్ సంద‌ర్భంగా ప్ర‌చార‌కార్య‌క్రమాల్లో శంకర్ ఈ రేంజులో ఇండ‌స్ట్రీ గుట్టు విప్పుతాడ‌ని ఎవరూ ఊహించ‌లేదు. ఇంకో ర‌కంగా చెప్పాలంటే శంక‌ర్‌లోని దూకుడు, కుర్ర‌త‌నంలోని వాడి వేడి ఓ రేంజులో ఉన్నాయ‌ని అతడి మాట‌లు అర్థ‌మ‌య్యేలా చెప్పాయి. అంతేకాదు .. త‌న‌పై తాను ఎంత కాన్ఫిడెంట్‌గా ఉన్నాడో శంకర్ ఆవేశంగా మాట్లాడిన తీరును బ‌ట్టి అర్థం చేసుకోవ‌చ్చు. క‌మెడియ‌నే క‌దా అని లైట్ తీస్కుంటామంటే కుద‌ర‌ద‌ని ఓ ర‌కంగా సూటిగా వార్నింగ్ ఇచ్చాడు. శంకర్ తాను త్రివిక్ర‌మ్‌తో ఉన్న చ‌నువుతో అలా అడిగి ఉండొచ్చు కానీ, డబ్బు పెట్టాలంటే ఎవ‌రైనా పెడ‌తారా? అంతెందుకు త్రివిక్రమ్ ద‌ర్శ‌క‌త్వంలో న‌టించాల‌ని, తిరిగి హీరోగా త‌న కెరీర్‌ని ట్రాక్‌లోకి తేవాల‌ని సునీల్ చాలా కాలంగానే వేచి చూస్తున్నాడు.
ఇద్ద‌రూ ఒకే రూమ్‌.. ఒకే మంచం.. ఒకే కంచంలో తిన్న బాప‌తు. అలాంటిది సునీల్‌కే ఇంకా అవకాశం లేదు. పైగా త్రివిక్రమ్ వ‌రుస‌గా పవన్, ఎన్టీఆర్, బన్ని, మ‌హేష్ లాంటి హీరోల‌తో సినిమాలు చేస్తున్నాడు. అంత పెద్ద స్టార్ల‌ను వ‌దులుకుని శంక‌ర్‌తో సినిమా చేస్తాడా? త‌న జిగిరీ దోస్తీ సునీల్‌ని కాద‌ని శంక‌ర్‌తో అత‌డు చేయ‌గ‌ల‌డా? అందుకే శంకర్ ఆవేశంలో లాజిక్ కూడా మిస్స‌య్యింద‌ని జ‌నం అభిప్రాయ‌ప‌డుతున్నారు. అయితే ఏదో ఒక‌రోజు త్రివిక్రమ్ త‌న‌తో సినిమా తీసేంత‌గా ఎదుగుతాన‌న్న అతడి కాన్ఫిడెన్స్‌, ఎమోష‌న్ మాత్రం అతడి స్పీచ్ విన్న అందరికీ న‌చ్చాయి.
