సినిమా ఇండస్ట్రీలో కాస్టింగ్ కౌచ్ (పడక సుఖం) గురించి పెద్ద దుమారం చెలరేగుతున్న విషయం తెలిసిందే. హాలీవుడ్ లో మొదలైన కాస్టింగ్ కౌచ్ ఇప్పుడు భారత దేశంలో పలు సినిమా ఇండస్ట్రీల్లో జరుగుతుందంటూ సినీ తారలు ఫిర్యాదులు చేస్తున్నారు. ఆ మద్య టాలీవుడ్ లో కాస్టింగ్ కౌచ్ బాగా పెరిగిపోయిందని నటి శ్రీరెడ్డి పెద్ద ఎత్తున పోరాటం చేసింది. తనను ఇండస్ట్రీలో కొంత మంది దారుణంగా మోసం చేశారని..కొత్తగా నటించే అమ్మాయిలను ఇండస్ట్రీలో కో డైరెక్టర్ నుంచి హీరోల వరకు వాడుకుంటున్నారని ఆరోపణలు చేసింది.
ఆ తర్వాత పలువురు నటీమణులు కూడా కాస్టింగ్ కౌచ్ గురించి గళం విప్పారు. తాజాగా తెలుగు సినీ పరిశ్రమలో క్యాస్టింగ్ కౌచ్ లేదని కమెడియన్ పృథ్వి తెలిపాడు. కొంత మంది వల్ల ఇండస్ట్రీకి చెడ్డ పేరు వస్తోందని అన్నారు. తన సినిమాలో హీరోయిన్ పాత్రకు సరిపోయే అమ్మాయి కోసమే నిర్మాత అన్వేషిస్తారని..ఎవరికి పడితే వారికి హీరోయిన్ వేషం ఇవ్వలేరని అన్నారు. ఒకప్పుడు విక్టరీ వెంకటేష్ నటించిన 'మల్లీశ్వరి' సినిమాలో హీరోయిన్ పాత్రకు కత్రినా కైఫ్ లాంటి అమ్మాయి అయితేనే సరిపోతుందని... ఇక్కడున్నవాళ్లతో ఆ పాత్రను చేయించలేమని తెలిపారు.
అంతే కాదు తెలుగు హీరోయిన్లు రాణించడం లేదని అంటున్నారు..మరి ఆమని, దివ్యవాణి మరికొంత మంది హీరోయిన్లు అచ్చమైన తెలుగు వాళ్లే కదా అన్నారు. టాప్ హీరోల పక్కన సరిపోయే తెలుగు అమ్మాయిలను చూపించండంటూ ఎదురు ప్రశ్నించారు. కొంత మంది డబ్బు గుంజడానికి పాపులారిటీ తెచ్చుకోవడానికి కొంత మంది తెగ ప్రయత్నాలు చేస్తున్నారని ఆగ్రహం వ్యక్తం చేశారు.
సినిమాల్లో పని చేసే మహిళలకు అద్దెకు ఇల్లు కూడా దొరకని పరిస్థితి ఉందని ఆవేదన వ్యక్తం చేశారు. ఓ సినీ నిర్మాత గురించి ఒక ఆవిడ తీవ్ర ఆరోపణలు చేసిందని... మరి ఆయన గురించి తెలిసి కూడా గెస్ట్ హౌస్ కు ఎందుకు వెళ్లిందని ప్రశ్నించారు. వాస్తవానికి నటీమణుల పట్ల అసభ్యంగా ప్రవర్తించేవారు ఇండస్ట్రీలో లేరని, కొందరు చేస్తున్న వ్యాఖ్యల వల్ల ఇండస్ట్రీ అంటేనే జనాల్లో చిన్నతనం ఏర్పడిందని అన్నారు.
