బయోపిక్ సినిమాలంటే కేవలం ఓ డాక్యుమెంటరీ లానే ఉంటాయన్న భావనని తొలగించి సినిమాటిక్ అప్పీల్ తో జనరంజకంగా తెరకెక్కిస్తున్నారు. ఇటీవల వచ్చిన మహానటి సినిమా దానికి ఓ చక్కని ఉదాహరణ ఇక ఇప్పుడు తెలుగులో బయోపిక్ ల హవా నడుస్తుంది. ఎన్.టి.ఆర్ బయోపిక్ ఆల్రెడీ మొదలవగా.. వైఎస్సార్ బయోపిక్ యాత్ర కూడా షూటింగ్ జరుపుకుంటుంది.
యాత్ర సినిమాను మహి వి రాఘవ డైరెక్ట్ చేస్తున్నాడు. విజయ్ చిల్లా, శషి దేవిరెడ్డి నిర్మిస్తున్నారు. వైఎస్సార్ పాదయాత్ర నేపథ్యంతోనే ఈ సినిమా రాబోతుంది. పాదయాత్రతో ప్రజల మనసులను గెలిచి సిఎం గద్దె ఎక్కిన మహానేత వై.ఎస్.ఆర్. యాత్ర టీజర్ ఈరోజు వై.ఎస్.ఆర్ పుట్టినరోజు సందర్భంగా రిలీజ్ చేశారు.
తెలుసుకోవాలని ఉంది.. వినాలని ఉంది.. ఈ కడప దాటి ప్రతి గడపలోకి వెళ్లాలని ఉంది.. వాళ్లతో కలిసి నడవాలని ఉంది.. వాళ్ల గుండెచప్పుడు వినాలని ఉంది.. గెలిస్తే పట్టుదల అంటారు.. ఓడిపోతే మూర్ఖత్వం అంటారు.. ఈ పాదయాత్ర నా మూర్ఖత్వమో.. పట్టుదలో.. చరిత్రనే నిర్ణయించుకోవచ్చు.. అని వై.ఎస్.ఆర్ పాత్రలో మమ్ముట్టి చెప్పిన డైలాగ్ అద్భుతంగా ఉన్నాయి.
నిజంగా వై.ఎస్ అభిమానులకు ఈ సినిమా ఎలాంటి కానుక ఇస్తుదో టీజర్ తోనే చెప్పేశారు దర్శక నిర్మాతలు. వై.ఎస్ గా మమ్ముట్టి పర్ఫెక్ట్ గా సూట్ అయ్యారు. టీజర్ తో అదరగొట్టిన యాత్ర సినిమా కూడా ప్రేక్షకుల మనసులను పరశింప చేసేలా ఉంటుందని అంచనా వేయొచ్చు.
