ఈ మద్య వరుసగా టాలీవుడ్ లో మల్టీస్టారర్ మూవీలు వస్తున్న విషయం తెలిసిందే. ఈ నేపథ్యంలో కింగ్ నాగార్జున, నేచురల్ స్టార్ నాని కాంబినేషన్ లో వస్తున్న సినిమా ‘దేవదాస్’.తాజాగా ఈ సినిమాకు సంబంధించిన ఫస్ట్ లుక్ రిలీజ్ చేశారు దర్శక నిర్మాతలు. వైజయంతీ మూవీస్ బ్యానర్ పై అశ్వనీదత్ నిర్మిస్తోన్న ఈ చిత్రం షూటింగ్ చివరి దశకు చేరుకోవడంతో ప్రమోషన్స్లో భాగంగా కొద్దిసేపటి క్రితం ఈ మూవీ ఫస్ట్లుక్ను ట్విట్టర్ ద్వారా విడుదల చేశారు నాగార్జున.
ఈ సినిమాలో నాగార్జున దేవ్గా నటిస్తుండగా.. దాస్గా నాని కనిపించనున్నారు. తాజాగా విడుదలైన ఫస్ట్లుక్లో దేవ్, దాస్లు ఇద్దరూ తప్పతాగి ఒకే మంచంపై ఒళ్లు తెలియకుండా పడిఉన్నారు. దేవ్ ఒక చేత్తో గన్, మరో చేత్తో మందు బాటిల్ పట్టుకుని మత్తుగా పడుకుని ఉండగా.. పక్కనే ఉన్న దాస్ మెడలో స్కెతస్కోప్ ఉండటం ఫస్ట్ లుక్ చాలా ఫన్నీగా ఉంది. దేవదాస్ ఫస్ట్లుక్ పోస్టర్ని బట్టి నాగార్జున డాన్గా, నాని డాక్టర్గా కనిపించనున్నట్లు తెలుస్తోంది. శ్రీరామ్ ఆదిత్య ఈ చిత్రాన్ని తెరకెక్కిస్తున్నారు.
ఈ హిలేరియస్ ఎంటర్టైనర్లో నాగార్జునకు జోడీగా ఆకాంక్ష సింగ్.. నానికి జోడీగా రష్మికా మందన్న నటిస్తున్నారు. ఈ సినిమా షూటింగ్ చివరిదశలో ఉంది. సెప్టెంబర్ 27న విడుదల చేయడానికి సన్నాహాలు చేస్తున్నారు. వైజయంతి మూవీస్ బ్యానర్పై అశ్వినీదత్ నిర్మాతగా.. సి. ధర్మరాజు సమర్పణలో ‘దేవదాస్’ తెరకెక్కుతోంది. నాగార్జున, నాని, రష్మికా మందన్న, ఆకాంక్ష సింగ్, నరేష్ వికే, బాహుబలి ప్రభాకర్, రావు రమేష్, వెన్నెల కిషోర్, అవసరాల శ్రీనివాస్, సత్య తదితరులు ఈ చిత్రంలో నటిస్తున్నారు.