టాలీవుడ్ లో ప్రతిష్టాత్మక సినిమాలు కంచె, గౌతమి పుత్ర శాతకర్ణి తెరకెక్కించిన ప్రముఖ దర్శకులు క్రిష్ తాజాగా మహానటులు ఎన్టీఆర్ బయోపిక్ కి దర్శకత్వం వహిస్తున్న విషయం తెలిసిందే. ఈ సినిమాలో నందమూరి బాలకృష్ణ హీరోగా నటిస్తున్నారు. ఈ సినిమాకు సంబంధించిన ఫస్ట్ లుక్ నిన్న రిలీజ్ చేశారు. అయితే ఈ సినిమాకు ముందు బాలీవుడ్ క్వీన్ కంగనా రనౌత్ ప్రధాన పాత్రలో ఝాన్సీ లక్ష్మీబాయి కథతో క్రిష్ తెరకెక్కించిన చిత్రం మణికర్ణిక - ద క్వీన్ ఆఫ్ ఝాన్సీ.
క్రిష్ ద‌ర్శ‌క‌త్వంలో రూపొందిన ఈ సినిమా ప్రస్తుతం పోస్ట్ ప్రొడక్షన్ కార్య‌క్ర‌మాలు జ‌రుపుకుంటుంది. ‘మణికర్ణిక’ పేరుతో హిందీలో ఝాన్సీ లక్ష్మి భాయి జీవిత కథ సినిమాగా రూపొందుతోంది. స్వాతంత్ర దినోత్సవం సందర్భంగా ఈ సినిమా ఫస్ట్ లుక్‌ను విడుదల చేశారు. శత్రువులు చుట్టుముట్టినప్పుడు ఆమె చూపిన వీరపరాక్రమం గురించి సినిమాలో అద్భుతంగా చూపించ‌నున్నార‌ట. ఈ సినిమాకు KV విజయేంద్ర ప్రసాద్ స్టొరీ అందించడం విశేషం.
ఈ పోస్టర్ లో చంటిపాపను వీపుకు తగిలించుకుని కదనరంగంలోకి దూసుకుపోతున్న ఝాన్సీ లక్ష్మీ భాయి రూపాన్ని కంగనా రనౌత్ ద్వారా కళ్లకు కట్టినట్లు చూపిస్తున్నాడు దర్శకులు క్రిష్. 1857 లో ఝాన్సీ రాణి ఈస్ట్ ఇండియా కంపెనీ వారితో యుద్ధం చేసిన ఎపిసోడ్ ఈ సినిమాలో కీలకమైనదట. సంగీత త్రయం శంకర్- ఎహసాన్- లాయ్ లు సంగీతం అందిస్తున్న ఈ చిత్రాన్ని జీ స్టూడియోస్ భారీ బడ్జెట్ తో నిర్మిస్తుంది. ఇప్పటికే షూటింగ్ పూర్తి చేసుకున్న ఈ సినిమా ప్రస్తుతం పోస్ట్ ప్రొడక్షన్ దశలో ఉంది. 'మణికర్ణిక' వచ్చే ఏడాది జనవరి 25 న రిలీజ్ చేసేందుకు నిర్మాతలు ప్లాన్ చేస్తున్నారు.
