సినిమా అంటే అతనికి విపరీతమైన పిచ్చి..దానికోసం దేనికైనా తెగించే పరిస్థితి..అలాంటి సమయంతో తనకు ఉన్న ఆస్తులు అమ్ముకొని ఓ సినిమా తీసి అడ్డగోలిగా నష్టపోయాడు. తర్వాత జీవితం మనోడికి అగమ్యగోచరంగా కనిపించింది. సినిమాలతో తనకు పరిచయమైన సినీ అసిస్టెంట్ ఈ హీరోకు జత కలిశాడు. అతడికి తీవ్రంగా అప్పులున్నాయి. దీంతో ఇద్దరూ కలిసి స్కెచ్ గీశారు. ఈ నేపథ్యంలో ఇళ్లకు తాళాలు వేయడం చూసి ఆ ఇళ్లు కొల్లగొట్టడం.. డబ్బులు కూడబెట్టి తమ అప్పులు తీర్చుకున్నారు.
కానీ వారి ఆశమాత్రం చావలేదు..మరిన్ని దొంగతనాలు చేస్తూ జల్సాలకు అలవాటు పడ్డారు. వివరాల్లోకి వెళితే.. కుషాయిగూడ జమ్మిగడ్డ ప్రాంతానికి చెందిన మహేష్.. విక్కీరాజ్ ఇద్దరూ చిన్ననాటి స్నేహితులు. మహేష్ కు సినిమాలంటే పిచ్చి కావడంతో సొంత డబ్బుతో ‘నివురు’ అనే సినిమా తీశాడు. అది బాక్సాఫీస్ వద్ద అట్టర్ ఫ్లాప్ అయ్యింది. దాంతో దారుణంగా అప్పుల్లో కూరుకు పోయాడు. ఇదే సమయంలో విక్కిరాజ్ తో జతకట్టాడు. విక్కీ సులువుగా డబ్బు సంపాదించేందుకు తాళం వేసి ఉన్న ఇళ్లలో దొంగతనాలు చేసేవాడు. ఆ దొంగ సొమ్మును హీరో మహేష్ డబ్బుగా మార్చేవాడు.
ఈ నేపథ్యంలో హబ్సిగూడ ప్రాంతంలో దొంగతనాలు చేయడానికి రెక్కీ నిర్వహిస్తుండగా పోలీసులకు పట్టుబడ్డారు. వారి వద్ద నుండి భారీ ఎత్తున బంగారం, వెండి, నగదును స్వాధీనం చేసుకున్నారు. నిందితుడు 'నివురు' అనే సినిమాలో హీరోగా నటించడం, ఆ సినిమా కారణంగానే దొంగతనాల వైపు మళ్లడం ఇండస్ట్రీలో చర్చనీయాంశం. విక్కీ 2016 నుంచి దొంగతనాలు చేస్తూ జైలుకు వెళ్లొచ్చినట్టు పోలీసుల విచారణలో తెలిసింది. జైలునుంచి బయటకు వచ్చి మహేష్ తో కలిసి తాజా ఇలా చోరీలకు పాల్పడుతూ దొరికిపోయాడు.
