తెలుగు ఇండస్ట్రీలో విలక్షణ నటుడు, కలెక్షన్ కింగ్ మోహన్ బాబు ఇప్పటి వరకు ఎన్నో విభిన్నమైన పాత్రల్లో నటించారు. హీరోయిజం, కామెడీ, విలనిజం.. ఎలాంటి పాత్ర అయినా సరే నటించడంలో సిద్ధహస్తుడు మోహన్ బాబు. పౌరాణిక, జానపద, సాంఘిక చిత్రాల్లో ఎన్నో పాత్రల్లో నటించి తనకంటూ ప్రత్యేక ఇమేజ్ సొంతం చేసుకున్నారు. స్వర్గీయ ఎన్టీఆర్ కొన్ని పౌరాణిక సినిమాల్లో మోహన్ బాబుని ప్రత్యేకంగా నటింపజేసేవారంటే..ఆయనకు ఎంతో అభిమానమో కొత్తగా చెప్పాల్సిన అవసరం లేదు. అందుకే మోహన్ బాబు అన్నగారూ అంటూ ఆప్యాయంగా పిలిచేవారు.
మోహన్ బాబు కెరీర్లో ఎక్కువ శాతం విలన్ పాత్రల్లోనే నటించారు. ఓ వైపు విలన్ గా నటిస్తూనే..హీరోయిజం ఉన్న సినిమాల్లో నటించారు. మోహన్ బాబు కేవలం నటుడిగానే కాకుండా నిర్మాత, దర్శకత్వ రంగంలో కూడా తన ప్రతిభ నిరూపించుకున్నారు. ఇటీవలే ‘గాయత్రి’ సినిమా ద్వారా తన నటనా పటిమను మరోసారి చూపించారు. అలాగే ‘మహానటి’లో మహానటుడు ఎస్వీఆర్ పాత్రను పోషించి ఆకట్టుకున్నారు.
కొంత కాలంగా ఆయన విలన్ పాత్రలకు దూరంగా ఉంటున్నారు. చాలా కాలం తర్వాత మోహన్ బాబు విలన్ గా నటించబోతున్నట్లు వార్తలు వస్తున్నాయి. తమిళ హీరో సూర్య ప్రధాన పాత్రలో రూపొందుతున్న ఒక సినిమాలో మోహన్ బాబు విలన్‌గా నటించబోతున్నారని సమాచారం. సుధ కొంగర దర్శకత్వంలో సూర్య హీరోగా ఒక సినిమా రూపొందుతోంది.
ఈ పాత్రను మోహన్ బాబు చేస్తే బాగుంటుందని నేరుగా సూర్యనే ఆయనతో మాట్లాడి ఒప్పించాడట. తమిళంతో పాటు తెలుగు ప్రేక్షకుల ముందుకు కూడా ఈ సినిమా వస్తుందని ప్రత్యేకంగా చెప్పాల్సిన పనిలేదు. గతంలో విక్టరీ వెంకటేష్ తో ‘గురు’ సినిమాను రూపొందించిన దర్శకురాలు సుధ. ఇప్పుడు సూర్య హీరోగా ఒక సినిమాను చేస్తోంది. ఈ ద్విభాష సినిమాలో నటించడానికి ఆయన సమ్మతించడం జరిగిందనేది టాలీవుడ్ సమాచారం. అధికారిక ప్రకటన రావాల్సి ఉంది.
