మా అసోసియేషన్ మాటల వింటుంటే ఆశ్చర్య కరంగా ఇంకొక పక్క వీరు మాట్లాడుతుంటే చిరాకుగా ఉంటుంది . కోటి రూపాయిల నుంచి పాతికకోట్ల వరకు రెమ్యూనిరేషన్ తీసుకునే హీరోలు మనకు వున్నారు. వీరందరూ సభ్యులుగా వున్న మా అసోసియేషన్ బిల్డింగ్ నిర్మాణానికి మాత్రం జనాల దగ్గర చందాలెత్తుతున్నారు. అమెరికా వెళ్లి కార్యక్రమాలు చేసి, జనాల దగ్గర డబ్బులు లాగడమే తప్ప, వీరు జేబుల్లోంచి తమ సంఘం కోసం, తమ సంఘ భవనం కోసం డబ్బులు తీసే ఆలోచన చేయడంలేదు.
మా అధ్యక్షుడు శివాజీ రాజా చెప్పిన లెక్కల ప్రకారం, మా దగ్గర వున్న నిధులు అయిదు కోట్లు. గతంలో రెండుకోట్లు వుండేవి. చిరంజీవిని అమెరికా తీసుకెళ్లడం ద్వారా ఓ కోటి సంపాదించారు. మరో రెండు కోట్లు యాడ్ చేయగలిగారు. ఇంకో అయిదు కోట్లు జోడించాలని ప్రయత్నం. దానికోసం మహేష్ ను, ప్రభాస్ ను, నాగార్జునను తీసుకెళ్తారట.
ప్రభాస్, మహేష్, రామ్ చరణ్, ఎన్టీఆర్, బన్నీ ఈ అయిదుగురు ఇరవై కోట్లకు పైగా తీసుకునే హీరోలు. మెగాస్టార్ చిరంజీవి వుండనే వున్నారు. వీళ్లు తమ సంఘానికి ఒక్కో కోటి విరాళం ఇచ్చినా చాలు. ఆరుకోట్లు వచ్చి పడతాయి. రవితేజ, బాలకృష్ణ, వెంకీ, నాగార్జున, అయిదు నుంచి పదికోట్లు తీసుకునే హీరోలు. ఈ నలుగురు తలా యాభై లక్షలు ఇచ్చినా చాలు. మరో రెండు కోట్లు రాలతాయి. వీళ్ల అసోసియేషన్ కు జనాలే డబ్బులు ఇవ్వాలి. ఇది చాలదన్నట్లు సంఘంలో పోగెట్టిన డబ్బుల్లో మళ్లీ కుంభకోణాలు కూడానూ. జనాలకు సినిమా పిచ్చి పోయే వరకు వీళ్ల వ్యవహారం ఇలాగే వుంటుంది.
